Abashakashatsi baturutse mu bihugu bitandukanye bya Afurika bateraniye mu Rwanda aho bitabiriye inama iri kwiga ku buryo bwo kurwanya indwara zititaweho uko bikwiye zugarije uyu Mugabane.
Ni inama y’iminsi itatu, iri kubera muri Kigali Convention Centre, yateguwe n’Umuryango ukora Ubushakashatsi ku ndwara zititaweho ku Mugabane wa Afurika, InCORND (International Conference on NTD Research in Africa).
Ubushakashatsi bwakozwe n’iki kigo bugaragaza ko izi ndwara zugarije umugabane wa Afurika, biturutse ahanini kw’ibura ry’amazi, ibibazo by’imirire mibi, isuku nke,ubukene n’ibindi.
Izi ndwara ahanini ziganjemo izifata amaso, uruhu, izo mu nda zirimo inzoka n’impiswi n’izindi nyinshi, gusa impuguke zigaragaza ko izi ndwara zishobora kwirindwa no kuvurwa zigakira.
Iyi nama yabereye mu Rwanda igamije kumenyesha abantu imibare y’abafite izi ndwara ndetse no gukangurira abantu uburyo bwo kuzirinda no kwivuza.
Iyi mibare igaragaza ko ku rwego mpuzamahanga izi ndwara ari 21, mu Rwanda haboneka icyenda gusa, gusa na zo zigomba kuba zaranduwe bitarenze mu 2030.
Imibare ya InCORND igaragaza ko ku Isi hari abantu bagera kuri miliyari hafi 1.5 y’abantu bafite indwara zititaweho biganjemo abo ku Mugabane wa Afurika.
