Umujyi wa Kigali watangiye igerageza ryo gushyiraho ingengabihe y’imodoka zitwara abagenzi mu buryo bwa rusange, hagamijwe kugabanya igihe abagenzi bamara bazitegereje cyangwa bicayemo bategereje ko zihaguruka.
Iri gerageza rimaze iminsi itanu, riteganya kuzamara ibyumweru bibiri, rikaba ryaratangiriye kuri ligne ya 203, itwara abagenzi bava muri gare yo mu Mujyi (Down Town) yerekeza mu ya Nyanza ya Kicukiro.
Byagarutswe n’Umuvugizi w’Umujyi wa Kigali, Emma Claudine, mu kiganiro na RBA, avuga ko hari gahunda zitandukanye ziri gushyirwa mu bikorwa, mu rwego rwo kurushaho kunoza ingendo zikorwa n’abantu mu buryo bwa rusange.
Imbogamizi zigikoma mu nkokora iyi gahunda zirimo ikibazo cy’umuvundo w’imodoka mu muhanda, utuma amasaha imodoka ikoresha yiyongera no kuba hari igihe bisi ihaguruka idafite abagenzi cyangwa ari bake cyane bikaba byateza igihombo kuri ba nyiri modoka.
Iyi ni gahunda izanozwa ku bufatanye n’indi mishinga irimo gushyiraho umuhanda wa bisi zitwara abagenzi gusa, hagamijwe kugira ngo niba bisi yahagurutse kare, igere aho igomba kugera ku gihe ndetse n’uburyo bwo kurengera ibidukikije.
Umujyi wa Kigali wifuza ko abantu benshi batangira gukora ingendo mu buryo bwa rusange, cyane ko bizagira ingaruka mu kugabanya imyuka ihumanya ikirere, kuko abantu benshi bazaba bakoresha uburyo bwa rusange.
Ku ruhande rw’abatwara abagenzi bagaragaza ko kwiyongera kw’ingendo bishobora gutuma bagira igihombo, basaba Leta ko bakomeza guhabwa nkunganire mu rwego rwo kwirinda igihombo.
Umuyobozi wa Sosiyete ya Royal Express, itwara abagenzi, Jules Cesar Ndabaganje, yagize ati “Ku ruhande rw’ikigo hagomba kugira igiciro cyiyongeraho kugirango ikigo cyibashe kubaho. Haramutse hatabonetse icyo kiguzi cyiyongeraho habaho igihombo.”
Igerageza ry’uyu mushinga nirirangira ni bwo hazafatwa umwanzuro wo kumenya niba uzakomeza kubahirizwa ndetse ukanagurirwa mu bice bitandukanye by’Umujyi wa Kigali.
