Rwanda Premier League yemeje umukino w’ikirarane w’umunsi wa gatatu, uzahuza Rayon Sports na APR FC, ku wa 7 Ukuboza 2024.
Ni itangazo Rwanda Premier League yashyize hanze yifashishije urubuga rwa X, ku wa mbere, tariki ya 25 Ugushyingo 2024, nyuma y’igihe kinini abafana b’umupira wo mu Rwanda bawutegereje.
Iyi Shampiyona yatangaje ko umukino uzahuza Rayon Sports na APR FC uzabera kuri Stade Amahoro, saa Kumi n’Ebyiri zo ku wa Gatandatu, tariki ya 7 Ukuboza 2024.
Ni umukino wari umaze igihe kinini wimurwa kuko wagombaga gukinwa bwa mbere, tariki ya 14 Nzeri 2024, uza gusubikwa bitewe nuko APR FC yari ifite indi mikino ya CAF.
Nyuma iyi Shampiyona yaje gushyira uyu mukino tariki ya 19 Ukwakira 2024, ariko ikipe ya APR FC itanga ubusabe bw’uko imikino y’ibirarane yakinwa uko ikurikirana, ndetse ubwo busabe buza kwakirwa.
Ikipe ya APR FC ifite indi mikino ibiri y’ibirarane irimo uwo izakira Bugesera FC ku wa 27 Ugushyingo, ndetse n’uwo izakirwamo na AS Kigali ku wa 1 Ukuboza 2024.
Ku rutonde rwa Shampiyona y’u Rwanda, APR FC iri ku mwanya wa 10 n’amanota 11 mu gihe Rayon Sport iri ku mwanya wa mbere, n’amanota 23.
