Umunyamategeko Fatikaramu Jean Paul wunganira mu mategeko Sengabo Jean Bosco uzwi nka Fatakumavuta, yavuze ko imbabazi The ben yatanze abinyujije ku mbuga nkoranyambaka zidafatika mu gihe atanditse ibaruwa ngo ayishyikirize urukiko.
Mu gitondo cyo kuri uyu wa gatatu, tariki ya 6 Ugushyingo 2024, The Ben yanyujije ubutumwa ku mbuga nkoranyambaga agaragaza ko yababariye Fatakumavuta, ndetse amusengera amusabira gufungurwa, anashimangira ko kuri we urukundo ruruta urwango.
Fatikaramu yagize ati “lyo umuntu atanze imbabazi ubutabera bugira inzira bubirebamo. Ushobora gutanga imbabazi urukiko rwabisuzuma, rukabisesengura rugasanga ari ngombwa imbabazi zigatangwa, ariko imbabazi zitanzwe kuriya (ku mbuga nkoranyambaga) ngira ngo ntabwo ziba zifatika, kubera ko ubundi iyo umuntu atanze imbabazi ubundi abikorera inyandiko ugashyiraho umukono, igashyigikirizwa urukiko, igashyirwa muri ‘System'”.
Yakomeje avuga ko imbabazi zo ku mbuga nkoranyambaga urukiko rutazimenya, avuga ko iyo umuntu atanze imbabazi ari impamvu ze bwite zihariye icyo gihe dosiye ishyikirizwa urukiko.
Fatakumavuta yasabiwe n’Urukiko rwa Kicukiro gufungwa iminsi 30 y’agateganyo nyuma yo gushinjwa ibyaha birimo gukangisha gusebanya, kubuza amahwemo hakoreshejwe mudasobwa, gukoresha ibiyobyabwenge, ivangura n’ibindi.
Ibi birego byatanzwe n’abantu batandukanye barimo Mugisha Benjamin (The Ben), Ngabo Medard (Meddy), Muyoboke Alex, Habiyaremye Jean Paul (Bahati) n’abandi bavuga ko yagiye abatangaho ubutumwa bufite amagambo agize icyaha yifashishije urubuga rwa Youtube na X.
Ubushinjacyaha bwagaragaje ko Fatakumavuta atumvise inama yagiriwe ahubwo agahitamo gukomeza gukora ibiganiro ndetse avuga ko ntiyongera no guhamagarwa atazitaba, akaba ariyo mpamvu yasabiwe gufungwa iminsi 30 y’agateganyo, nk’uburyo bwo kuba ahagaritse ibikorwa bisa n’ibyo akurikiranyweho.
