Ku mupaka munini uhuza u Rwanda na Repubulika Iharanira Demokarasi ya Congo, DRC, uzwi nka La Corniche (Grande Barriere), hagiye kubera ibiganiro bihuza intumwa z’ibi bihugu byombi n’iza Angola.
Izi ntumwa ku ruhande rw’u Rwanda ni Minisitiri w’Ububanyi n’Amahanga n’Ubutwererane Amb. Olivier Nduhungirehe, naho ku ruhande rwa DRC ni Minisitiri w’Ubabanyi n’Amahanga, Thérèse Kayikwamba, mu gihe ku ruhande rwa Angola hariho Minisitiri w’Ububanyi n’Amahanga Tete Antonio Akaba.
Izi ntumwa zigiye kuganira ku bibazo by’umutekano mucye uri mu Burasirazuba bwa DRC, no kwemeranya itangizwa rya gahunda ihuriweho yemejwe yo gusenya umutwe w’Iterabwoba wa FDLR.
Ibi biganiro bigiye kuba nyuma y’iminsi mike Inzobere mu iperereza z’ibi bihugu byombi zemeranyije gahunda ihuriwe yo gusenya umutwe wa FDLR.
Mu rwego rwo kubungabunga umutekano n’imigendekere myiza y’ibiganiro, DRC yabaye ifunze umupaka munini, isaba ko abashaka kwambuka bakoresha umupaka muto.
