Rurangirwa Wilson wamamaye nk’umupfumu Salongo yatawe muri yombi tariki ya 31 Ukwakira 2024, akurikiranweho ibyaha bine birimo kwiyitirira urwego rw’umwuga.
Ni amakuru yemejwe n’Urwego rw’Igihugu rw’Ubugenzacyaha, RIB, akaba akurikiranweho ibyaha birimo kwihesha ikintu cy’undi hakoreshejwe uburiganya, gukoresha inyandiko mpimbano, kwiyitirira urwego rw’umwuga cyangwa kwiha ubushobozi buhabwa umuntu ufite impamyabushobozi ndetse n’icyaha cy’iyezandonke.
RIB ivuga ko yari amaze igihe kinini akorwaho iperereza nyuma y’ibirego bitandukanye birimo iby’abantu yijeje ko ari umuvuzi gakondo ashobora kubavura indwara zitandukanye.
Ibi bikorwa by’uburiganya yabikoreraga mu Kagari ka Maranyundo, Umudugudu wa Mayange, akaba afungiye kuri sitasiyo ya RIB ya Nyamata aho asanzwe atuye mu Karere ka Bugesera.
RIB yavuze ko iperereza rigikomeje kugirango akorerwe dosiye ishyikirizwa ubushinjacyaha.
