Umutoza w’ikipe y’Igihugu y’Amavubi byemejwe ko agiye kujya mu biruhuko mu gihugu akomokamo cy’u Budage, bityo akaba atazatoza imikino ibiri u Rwanda ruzahuriramo na Sudani y’Epfo.
Ni amakuru yatangajwe n’IGIHE, yemerewe n’Umunyamabanga Mukuru wa FERWAFA, Kalisa Adolphe ‘Camarade’, aho asobanura ko ibijyanye no kujya mu biruhuko mu minsi mikuru, Torsten yabisabye mbere y’uko atangira akazi.
Amakuru avuga ko Torsten yamaze gutangariza abo bakorana mu ikipe y’Amavubi ko azerekeza mu Budage, ku wa kabiri, bityo atazaba ahari mu mikino ya nyuma yo gushaka itike ya CHAN, u Rwanda ruzahuriramo na Sudani y’Epfo.
Muri iyi mikino y’ijonjora rya nyuma ryo gushaka itike ya CHAN 2024, Sudani Y’Epfo izakira u Rwanda ku wa 22 Ukuboza, mu gihe uwo kwishyura uzabera muri Stade Amahoro tariki ya 28 Ukuboza 2024, iyi mikino yombi izatozwa na Jimmy Mulisa na Rwasamanzi Yves bungirije.
Gahunda y’imikino ya CHAN 2024, yashyizweho na CAF, iteganya ko imikino ya nyuma izakinwa tariki ya 1-28 Gashyantare 2025 muri Uganda, Tanzania na Kenya.
