Umwana w’Umunyarwanda witwa Josh Duc Nteziryayo w’imyaka 15 yahamagajwe mu bakinnyi bazahagararira ikipe y’Igihugu yabatarengeje imyaka 17 ya Canada, mu mikino y’amarushanwa izwi nka ‘CANM17’, iteganyijwe muri uku Gushyingo.
Josh Duc Nteziryayo yasohotse ku rutonde rw’abakinnyi 22 bazahagararira iyi kipe, mu marushanwa yo gushaka itike y’Igikombe cy’Isi cyabatarengeje imyaka 17 kizaba muri Qatar muri 2025.
Biteganyijwe ko imikino ya mbere ya gicuti izabera Costa Rica, aho Canada izakina na Mexico tariki ya 15 Ugushyingo, yongere guhura na San José ya Costa Rica tariki ya 18 Ugushyingo 2024.
Uyu mwana w’Umunyarwanda ufite impano idasanzwe yo guconga ruhago asanzwe akinira ikipe y’abatarengeje imyaka 18 ya Montreal FC yo muri Canada, aho akina nka myugariro ndetse no mw’ikipe hagati nka nimero gatandatu.
Iyi kipe ikina ikiciro cya mbere cya Shampiyona ya Major League Soccer yo mu Burasirazuba, yayinjiyemo muri Nyakanga 2018, ndetse muri Shampiyona iheruka yayifashije kugera ku mukino wa nyuma yatsinzweho n’ikipe ya Leta Zunze Ubumwe za Amerika.
Duc Nteziryayo avuka ku babyeyi bombi b’Abanyarwanda aribo Nteziryayo Paulin na Iradukunda Liliane.
