Minisiteri y’Ibikorwaremezo yatangaje ko mu mpera z’umwaka wa 2025, hazatangira imirimo yo kubaka umushinga munini w’Urugomero rw’Amashanyarazi rwa Ruzizi III uzajya utanga MW 206 ku bihugu bitatu ari byo u Rwanda, u Burundi na Repubulika Iharanira Demokarasi ya Congo, RDC.
Ni ibyagarutsweho mu nama yabaye kuri uyu wa Gatanu, tariki ya 17 Mutarama 2025, yahuje Minisiteri y’Ibikorwaremezo n’abafatanyabikorwa b’umushinga w’iyubakwa ry’Urugomero rwa Ruzizi III, bareba aho ugeze ushyirwa mu bikorwa.
Uyu mushinga uri mu biganza by’Ikigo cya Ruzizi III Regional Hydropower, cyihariye 70% yawo, uzuzura utwaye miliyoni $759, ni mu gihe ibindi bihugu bitatu bizagabana 30% isigaye.
Ni umushinga witezweho kuba igisubizo cy’amashanyarazi adahagije mu bice byegereye umupaka, ndetse no gutanga amashanyarazi atangiza ikirere, nk’uko byavuzwe na Minisitiri w’Ibikorwaremezo, Gasore Jimmy.
Ati “Ni umushinga dutegereje cyane nk’igihugu, ndetse n’ibindi bihugu tuwuhuriyeho kubera ko uzatwongerera umuriro uhagije w’amashanyarazi, Megawatt zigera kuri 80 kuri buri gihugu. Twumva ko ari umushinga dutegereje cyane, kubera ko uduha amashanyarazi adahungabanya ibidukikije.”
Minisitiri Gasore yakomeje avuga ko ibiganiro hagati y’ubuyobozi n’abubaka byatangiye ndetse biteze ko mu mpera za 2025, bizaba birangiye, bagatangira kubaka uru rugomero ruzaba rwuzuye mu myaka itanu.
Umushinga wo kubaka Urugomero rwa Ruzizi ya III umaze imyaka 10 wigwaho. Mu 2019 ni bwo u Rwanda, RDC n’u Burundi byashyize umukono ku masezerano yo gutangira kurwubaka yabereye i Kinshasa.
Umuyobozi w’Ikigo gishinzwe Ihuzabikorwa ry’Iterambere ry’Ingufu mu Karere ka Afurika y’Iburasirazuba, EAC, Great Lakes Energy Organisation (EGL), Charles Mbenga, yasabye ibihugu uko ari bitatu ko ahazakorerwa ibikorwa byo kubaka hazaba hari umutekano usesuye.
