Umuhanzi Weasel yatangaje ko Umunyarwandakazi Teta Sandra bitegura kurushinga, aherutse gukubitwa ingumi n’umuhanzi Chagga, ariko uyu wamukubise akaba ariwe uvuga ko arembeye mu bitaro.
Yifashishije imbuga nkoramyambaga ze Weasel yasangije amashusho agaragaza Teta Sandra abanza guterana amagambo na Chagga, nyuma uyu muhanzi aza kumukubita ingumi mu maso.
Amakuru IGIHE yakuye i Kampala avuga ko nyuma Weasel yaba yarahise akubita Chagga warumaze gukubita Teta Sandra.
Ashyira hanze aya mashusho, Weasel yavuze ko ababajwe no kubona umuntu wamukubitiye umugore ariwe uri gutaka ko arwariye mu bitaro, ndetse ko yagerageje kumuha amahirwe ngo asabe imbabazi Teta Sandra ariko bikaba iby’ubusa.
Ati “ Birababaje cyane kuba umuntu uherutse gukubita umugore wanjye ari we noneho uvuga ko arwaye kandi arwariye mu bitaro. Mu cyumweru gishize namuhaye amahirwe yo gusaba imbabazi umugore wanjye, ariko ntiyabikora. “
Weasel yasoje ubu butumwa bwe agaragaza ko yahisemo ko iki kibazo gikemurwa n’amategeko, ndetse ko yizeye ubutabera.
