Ikigo Yalla Yalla Group kigamije guteza imbere ubuhinzi gikomeje gufasha abahinzi bahinga Ibishanga bitandukanye byo mu turere tw’Amajyepfo n’Iburengerezuba mu kongera umusaruro.
Ku bufatanye n’Ikigo gishinzwe Iterambere ry’Ubuhinzi n’Ubworozi (RAB), Yalla Yalla Group imaze iminsi ifasha abahinzi bahinga mu bishanga byo mu turere turindwi, kongera umusaruro bakora ubuhinzi bugezweho. Ibi bizakomeza gukorwa gitanga inzobere zacyo mu buhinzi, zifasha abaturage gukora ubuhinzi bugezweho kandi butanga umusaruro.
Itsinda riyobowe n’umuyobozi mukuru wa Yalla Yalla Group, Ndayizigiye Emmanuel, ryabashije kugenzura uko igihembwe cy’ihinga A2025 kiri gushyirwa mu bikorwa, ndetse hanarebwa imbogamizi nyamukuru zigaragaramo ari nako hashakwa ibisubizo birambye
Umuyobozi wungirije wa Yalla Yalla Group Ishimwe Emmanuel, yavuze ko basanze abahinzi bose biteguye. Ati “Abahinzi twasanze biteguye, wabonaga ko icyo bari bategereje ari uko imvura igwa bagahita batangira gutera [Imbuto]. Twasanze bafite imbogamizi y’uko izuba ryatse igihe kirekire, ugasanga mu bishanga amazi yaragabanyutse.”
Akomeza avuga ko kuba imvura yaratangiye kugwa ubu abahinzi bagiye gufashwa gutera imyaka, gusa agaragaza ko n’ahakiri ibibazo by’imvura biteguye kubafasha gukoresha uburyo bwo kuhira.
Nkurunziza Felix, umuhinzi w’umuceri mu gishanga cya Rwamamba mu Karere ka Huye yavuze ko mu mwaka bamaze bafashwa n’inzobere za Yalla Yalla Group, umusaruro wiyongereye.
Ati “Nk’ubu mu gihembwe cy’ihinga A cy’umwaka wabanje, twari dufite toni 131 kuri hegitari 39, mu gihe igihembwe twasaruye ejobundi twabonye toni 183. Habayeho kwiyongera k’umusaruro ku buryo bugaragara. Igihembwe cya B ugereranyije n’icyari cyabanje, twari dufite toni 101, ubu twabonye toni 150. Buri gihembwe hari toni 50 ziyongeraho.”
Akomeza avuga ko kandi byaba byiza izo nzobere mu buhinzi zikomeje kubafasha mu gihe kirekire kugira ngo abaturage bamenyere gukora ubuhinzi bw’umwuga.
