Ihuriro ry’Ingabo za Repubulika Iharanira Demokarasi ya Congo ryazindutse rigaba ibitero ku barwanyi ba umutwe wa M23 muri teritware ya Kabare mu ntara ya Kivu y’Amajyepfo.
Ni imirwano yatangiye mu rukerera rwo kuri uyu wa kabiri tariki ya 24 Kamena 2025, aho bivugwa ko habaye ihangana rikomeye ku mpande zombi.
Amakuru avuga ko ahitwa Cirunga ariho ihuriro ry’Ingabo za RDC rigizwe na FARDC, FDNB, FDLR na Wazalendo ryagabyeho igitero.
Bivugwa ko n’ubwo imirwano yamaze hafi amasaha atatu impande zombi zihanganiye muri ako gace, ariko AFC/M23 yabashije guhashya ihuriro ry’ingabo za RDC zarigabyeho ibitero.
Ku Cyumweru nabwo ingabo za Congo n’abambari bazo bari bagabye igitero kuri uyu mutwe mu duce duherereye muri Kalehe, muri teritware yegeranye niya Kabare.
Ni ibitero byarangiye uru ruhande rwa Leta rukubiswe inshuro, ndetse kugeza ubu AFC/M23 biracyagenzura ibice byinshi byo muri Kabare na Kalehe.
Ni ibice abarwanyi ba AFC/M23 bigaruriye na mbere y’uko bafata umujyi wa Bukavu akaba n’umurwa mukuru w’intara ya Kivu y’Amajyepfo.
