Minisitiri w’Ubumwe bw’Abanyarwanda n’Inshingano Mboneragihugu, Dr Bizimana Jean Damascène, yasabye urubyiruko kurwanya ingengabitekerezo ya Jenoside no gukomera ku bumwe bw’Abanyarwanda, avuga ko Ubunyarwanda bwasenywe na politiki mbi ari nayo yagejeje u Rwanda kuri Jenoside yakorewe Abatutsi mu 1994.
Ibi Minisitiri yabibabwiye mu kiganiro yahaye urubyiruko rusaga 300, harimo urwaturutse mu turere twa Rubavu, Nyabihu, Ngororero na Nyamasheke, ruri mu cyiciro cyihariye cy’abatari mu mashuri. Ni muri gahunda ya ‘Rubyiruko Menya Amateka Yawe’, igamije gufasha urubyiruko kumenya amateka y’u Rwanda no kubaka ubumwe n’ubwiyunge.
Muri uru rubyiruko, harimo abahoze mu mitwe yitwaje intwaro yakoreraga mu mashyamba ya Repubulika Iharanira Demokarasi ya Congo (RDC), bamaze gutaha mu Rwanda mu bihe bitandukanye.
Minisitiri Dr Bizimana yagarutse ku ruhare rw’Abakoloni mu gusenya Ubunyarwanda, avuga ko aribo bazanye irondabwoko barinyujije mu burezi no mu butegetsi, bikaza kuvamo ingengabitekerezo ya Jenoside.
Ati “Ubunyarwanda bwasenywe na politiki mbi, Abakoloni bazanye irondabwoko mu burezi no mu buyobozi. Ibyo ni byo byateje Jenoside. Ni ngombwa ko urubyiruko rwiyemeza kurwanya iyo ngengabitekerezo aho yagaragara hose.”
Minisitiri yakomeje asaba urubyiruko gushyigikira ubuyobozi bw’igihugu, arushishikariza kurengera amahame y’ubumwe, amahoro n’iterambere u Rwanda rwagezeho.
Ati “Mukunde ubuyobozi bw’Igihugu cyacu, mubushyigikire, mubufashe, kuko kuva mu 1962 ni bwo bwa mbere mu Rwanda dufite ubuyobozi bwigisha ubumwe bw’Abanyarwanda, bukorera Abanyarwanda bose nta vangura. Utishoboye agahabwa Mituweli, abari mu manegeka bakimurirwa aheza.”
Yasoje asaba urubyiruko gukomera ku cyerekezo cy’igihugu, arwibutsa ko kiri gishingiye ku iterambere rirambye, rifitiye Abanyarwanda bose akamaro.
