Minisiteri Ishinzwe Ibikorwa by’Ubutabazi (MINEMA), yashyikirije Akarere ka Musanze inzu 115 zubakiwe abaturage basenyewe n’ibiza mu Murenge wa Musanze, Akagari ka Kabazungu.
Izi nzu zubatswe kuri site ya Kabazungu, zatwaye arenga miliyoni 800 y’amafaranga y’u Rwanda. Zije zisanga izindi zirenga 2,500 zubatswe mu cyiciro cya mbere, zigenewe abasenyewe n’ibiza bo mu Ntara y’Amajyaruguru n’Uburengerazuba, ubu bamaze gutuzwa.
Uyu mushinga wo kubaka izi nzu watewe inkunga na Banki y’Isi binyuze muri gahunda ya CERC Project (Contingency Emergency Response Component), ugamije gufasha mu guhangana n’ingaruka z’ibiza n’imyuzure byibasiye abaturage ku itariki ya 2 n’iya 3 Gicurasi 2023.
Minisitiri w’Ibikorwa by’Ubutabazi, Maj. Gen. (Rtd) Albert Murasira, yasabye abaturage kuzafata neza izi nzu bubakiwe, anabibutsa ko ari umusingi w’iterambere ryabo ndetse n’iry’igihugu muri rusange. Yanabasabye gukomeza kwiyubaka no kugana ibikorwa bibateza imbere.
Mu gutaha izi nzu, Minisitiri yari aherekejwe na Guverineri w’Intara y’Amajyaruguru, Maurice Mugabowagahunde, Umuyobozi w’Akarere ka Musanze, Nsengimana Claudien, hamwe n’abandi bayobozi mu nzego zitandukanye.
Abaturage bahawe izi nzu, bari barasizwe iheruheru n’ibiza, bishimiye kuba batujwe mu nzu zijyanye n’igihe, nk’uko bari barabisezeranyijwe na Perezida wa Repubulika ubwo yabasuraga, akabaha ikizere n’ihumure.
Bibukijwe ko ubu bufasha bahawe n’ibindi biteganyijwe byose babikesha imiyoborere myiza ishyira umuturage ku isonga.
Uretse izi nzu 115 zatashywe, hari izindi zirenga 2,000 zigikomeje kubakwa mu turere turindwi twibasiwe cyane n’ibiza aritwo: Musanze, Burera, Rubavu, Nyabihu, Karongi, Ngororero na Rutsiro.
