Rayon Sports yasinyishije Rutahizamu mushya ukomoka muri Repubulika Iharanira Demokarasi ya Congo, Schadrak Bingi Belo, amasezerano y’imyaka ibiri.
Uyu rutahizamu w’imyaka 20 ukomoka muri Congo, yakiniraga Daring Club Motema Pembe (DCMP) y’iwabo, yatsinzemo ibitego 23 mu myaka ibiri iheruka.
Uyu mukinnyi w’imyaka 20, yakiniraga ikipe ya Daring Club Motema Pembe (DCMP) yo muri Congo, ni umwe mu bakinnyi bafite impano n’ubuhanga mu busatirizi.
Mu myaka ibiri ishize, Belo yatsinze ibitego 23 muri shampiyona ya RDC, aho mu mwaka ushize yatsinze ibitego 13, mu gihe uwari wabanje yatsinze 10, afasha DCMP gusoza shampiyona iri ku mwanya wa kane.
Rayon Sports ivuga ko izakomeza kongera imbaraga mu ikipe, aho isigaje kugura abakinnyi babiri barimo myugariro n’umukinnyi wo hagati mbere y’uko shampiyona itangira.
Belo abaye umukinnyi wa gandatu mushya usinyiye Gikundiro muri iyi mpeshyi, nyuma ya Musore Prince, Rushema Chris, Tambwe Gloire, Mohamed Chelly, n’umunyezamu Drissa Kouyaté.
Umuyobozi wa Rayon Sports, Twagirayezu Thadée, aherutse gutangaza ko ikipe izakoresha abakinnyi 26 gusa mu mwaka w’imikino wa 2024/2025, bavuye kuri 35 yakoresheje umwaka ushize. Muri aba bakinnyi, harimo 13 b’Abanyarwanda na 13 b’abanyamahanga, mu rwego rwo kongera ireme n’ubwuzuzanye mu ikipe.
