Urukiko Rwisumbuye rwa Gasabo rwatesheje agaciro ubujurire bwa Bishop Gafaranga, rushimangira icyemezo cy’Urukiko rw’Ibanze rwa Nyamata cyo gufungwa iminsi 30 y’agateganyo.
Ku wa 23 Gicurasi 2025 Urukiko rw’Ibanze rwa Nyamata mu Karere ka Bugesera rwategetse ko Habiyambere Zacharie wamenyekanye nka Bishop Gafaranga, afungwa iminsi 30 y’agateganyo mu gihe ategereje kuburana mu mizi.
Ku itariki 7 Nyakanga 2025 Urukiko rwisumbuye rwa Gasabo rwaburanishije urubanza rw’ubujurire bwatanzwe na Habiyaremye Zacharie alias Bishop Gafaranga.
Bishop Gafaranga yabwiye urukiko ko umugore we atakubiswe kandi ko habayeho kugenekereza mu rubanza rwa mbere, yasabye ko umugore we yajyanwa ahiherereye bakareba niba afite ibikomere cyangwa se inkovu yaba afite mu myaka bamaze babana.
Ubushinjacyaha bushinja Bishop Gafaranga icyaha cyo gukubita no gukomeretsa ndetse no guhoza ku nkeke uwo bashyingiranywe. Ibi byaha ashinjwa kubikorera umugore we, Annet Murava.
Bishop Gafaranga yatawe muri yombi n’Urwego rw’Igihugu rw’Ubugenzacyaha (RIB) tariki ya 7 Gicurasi 2025, rumukekaho ibyaha by’ihohotera rishingiye ku gitsina.
