Abagore b’abasirikare n’abandi bapfakajwe n’intambara ihanganyemo ingabo za FARDC n’umutwe wa AFC/M23 bagiye mu mu mihanda bakora imyigaragambyo basaba guhabwa imishahara y’ibirarane ku bagabo babo bari kurugamba n’abaruguyeho.
Ni imyigaragambyo bakoze ku wa mbere tariki ya 14 Nyakanga 2025, bayikorera mu mujyi wa Beni mu ntara ya Kivu ya Ruguru.
Aba bagore b’abasirikare n’abandi bapfakajwe n’intambara mu gukora iyi myigaragambyo bitwaje ibyapa byanditseho ubutumwa bwibyo basaba ubutegetsi bw’igihugu cyabo.
Baherekejwe n’abana babo banyuze mu mugi hose berekana ubutumwa bwanditse ku byapa bari bitwaje, aho byari byanditseho ngo: “Turasaba imishahara y’ibirarane ku bagabo bacu bapfiriye ku rugamba mu ntambara leta ya Repubulika Iharanira Demukarasi ya Congo ihanganyemo na AFC/M23.”
Muri iyi myigaragambyo bari mu masangano y’imihanda mu mujyi wa Beni baje no gutwika amapine y’imodoka, bakumira n’imodoka zatambukaga.
Mu butumwa bw’amajwi yabo, bavuga ko “guhembwa atari ineza bagirirwa, ahubwo ko ari uburenganzira bwabo, banamagana inyerezwa ry’amafaranga agenerwa abasirikare bari ku rugamba.”
Umwe muri aba bigaragambyaga, yabwiye itangazamakuru ko bamaze amezi arindwi bavuye i Goma, ariko ko ntacyo barigera bahabwa, bavuga ko bajya babwirwa ko amafaranga yabo ari i Kinshasa.
Bavuga ko imiryango yaba bigaragambyaga, ibayeho nabi ndetse n’abana babo ntibakijya ku mashuri kubera kubura ubushobozi.
Nyamara Leta yohereje abasirikare bo kujya guhosha iyo myigaragambyo, ariko nta numwe muri aba bayobozi b’i Kinshasa wigeze asubiza ibyiyo myigaragambyo.
