Umugaba Mukuru w’Ingabo z’u Rwanda, Gen Mubarakh Muganga, ari kumwe na CP George Rumanzi, wari uhagarariye Umuyobozi wa Polisi y’u Rwanda, bitabiriye inama ya 34 y’Ingabo z’Umuryango wa Afurika y’Iburasirazuba zihora ziteguye gutabara aho rukomeye (Eastern Africa Standby Force – EASF).
N’inama uri kubera i Mogadishu, mu gihugu cya Somalia, kuva tariki ya 17 kuzageza ku ya 19 Nyakanga 2025.
Iyi nama ihuriyemo abagaba b’ingabo n’abayobozi mu nzego z’umutekano baturutse mu bihugu bigize EASF, irigira hamwe politiki n’ingamba zigamije gukomeza gutsura amahoro n’umutekano mu Karere.
Abitabiriye iyi nama barasesengura uko habaho imikoranire irambye n’ikorwa ry’imyiteguro ihamye y’ubutabazi mu bihe bikomeye byugarije umutekano.
Ibihugu icyenda bigize EASF ni byo byitabiriye iyi nama, birimo: u Burundi, Comoros, Djibouti, Ethiopia, Kenya, u Rwanda, Somalia, Sudani na Uganda.
EASF ni umutwe w’ingabo n’inzego z’umutekano washyiriweho gufasha mu kugarura amahoro mu gihe hari ibibazo by’umutekano muke muri aka karere. Ukorana n’umuryango wa Afurika yunze Ubumwe (AU) mu rwego rwo kubaka ubushobozi bwo gutabara byihuse no guhosha amakimbirane.
