Urwego ngenzuramikorere (RURA) rwatangaje ko ibiciro by’ibikomoka kuri Peterori byazamutseho mu gihe cy’amezi abiri ari imbere.
RURA yatangaje ibiciro bishya by’ibikomoka kuri peterori, mu itangazo ryagiye hanze ku mugoroba wo ku wa gatanu, tariki ya 5 Nzeri 2025.
RURA yatangaje ko igiciro ntarengwa cya Lisansi ari amafaranga y’u Rwanda 1,862 kuri litiro, kivuye ku mafaranga 1803 Frw cyariho kuva tariki ya 1 Nyakanga uyu mwaka.
Ni mu gihe igiciro cya mazutu cyageze ku mafaranga 1,808 Frw kuri litiro, kivuye ku 1,757 Frw cyariho nabwo kuva muri Nyakanga.
Iki kigo cyatangaje ko ibi biciro bizatangira gukurikizwa uhereye kuri uyu wa gatandatu, tariki ya 6 Nzeri 2025.
Bongeyeho kandi ko mu rwego rwo guhangana n’ihindagurika ry’ibiciro by’ibikomoka kuri peteroli ku isoko mpuzamahanga, Guverinoma y’u Rwanda ikomeje gucunga neza ububiko bw’ibikomoka kuri peteroli no gushyira mu bikorwa imicungire myiza y’ubukungu muri rusange hagamijwe kurengera abaguzi no kwirinda izamuka rikabije ry’ibiciro.
