Eric Rwabidadi yashyikirije Minisitiri w’Ububanyi n’Amahanga wa Cameroon, Lejeune Mbella Mbella ibaruwa imwemerera kuyobora Ikigega Mpuzamahanga gishinzwe Iterambere ry’Ubuhinzi n’Ubworozi (IFAD) muri Afurika yo Hagati no muri Cameroon.
Eric Rwabidadi yagizwe Umuyobozi Mukuru wa IFAD muri Afurika yo Hagati no muri Cameroon, aho azaba ahagarariye ibikorwa by’iki kigega mu bihugu bitandukanye byo mu Karere.
Ibiro bye biri muri Afurika yo Hagati ku kicaro cya IFAD, akaba ashinzwe gucunga ibikorwa muri Cameroun, Repubulika Iharanira Demokarasi ya Congo, Congo-Brazzaville, Chad, Gabon, Guinea Equatorial, Centrafrique ndetse na Sao Tome et Principe.
Minisiteri y’Ububanyi n’Amahanga ya Cameroon yishimiye kwakira Eric Rwabidadi, nawe abasezeranya ko azakomeza ubufatanye busanzwe burangwa hagati y’impande zombi.
Rwabidadi amaze imyaka irenga 20 akorera mu muryango wa IFAD, aho yari asanzwe ari umuyobozi wa IFAD, mu Ishami rishinzwe Afurika y’Uburengerazuba n’iyo Hagati.
Mbere yo kujya kuri uyu mwanya yayoboye ibikorwa bitandukanye muri Afurika, mu bihugu birimo Kenya, Sudani y’Epfo, Uburundi, Zambia n’ahandi hanze ya Afurika.
Ni numwe mu bagize uruhare muri gahunda yo kushyira ibiro bya IFAD, mu bihugu bitandukanye, yatangiye mu 2005, ndetse yabaye n’Umuyobozi wayo mu Rwanda, U Burundi, Kenya na Zambia.
Rwabidadi ni umunyamategeko ubifitemo uburambe bw’imyaka 15.
