Imirwano ikomeye yongeye kubura i Mpety muri teritware ya Walikale mu ntara ya Kivu y’Amajyaruguru hagati y’ihuriro ry’Ingabo za Repubulika iharanira demukarasi ya Congo n’iza Alliance Fleuve Congo, AFC/M23.
Mu masaha ya saa kumi z’urukerera zo kuri uyu wa mbere tariki ya 22 Nzer 2025, nibwo iyi mirwano yatangiye muri Mpety no mu nkengero zayo.
Amakuru aturuka muri ako karere avuga ko guhera mu gitondo cya kare humvikanye urusaku rw’imbunda ziremereye n’izoroheje muri Mpety mu birometero 18 uvuye mu mujyi wa Pinga uri mu mijyi ikomeye yo muri teritware ya Walikale.
Akomeza avuga ko uruhande rwa Leta ya Congo arirwo rwateye mu birindiro by’uyu mutwe bahanganye wa AFC/M23 ubundi nawo wirwanaho, kugeza ku mwanywa ibintu byari bikomeye ku mpande zombi.
Amakuru amwe avuga ko uruhande rwa Leta rwasubijwe inyuma, noneho uyu mutwe wa AFC/M23 ukaba uri kugenzura Mpety yose n’inkengero zayo.
Mu mpera zakiriya cyumweru gishize, imirwano kandi hagati y’impande zombi yabereye mu gace ka Katobi na Banakindi hafi ya Mpety.
Ku wa Gatandatu ingabo za FARDC zagabye ibitero byo mu kirere zikoresheje indege zo mu bwoko bwa Sukhoi-25 na drones za Ch-4 mu duce twa Nyarusumba, Mukwengwa, Bibwe, Nyenge, na Hembe duherereye muri Sheferi ya Bashali Mukoto muri teritware ya Masisi.
