Pyramids FC yo mu Misiri yatsinze APR FC ibitego 2-0, mu mukino ubanza w’ijonjora ry’ibanze rya CAF Champions League.
Ni umukino wabereye kuri Kigali Pele Stadium, kuri uyu wa gatatu tariki ya 01 Ukwakira 2025.
Uyu mukino wari witabiriwe bikomeye kuko Pele Stadium yari yuzuye. Wanitabiriwe na bamwe mubakora mu nzego z’umutekano (abasirikare n’abapolisi) baje gushyigikira APR FC.
Umutoza Taleb Abderrahim wa APR FC yabanje mu kibuga Ishimwe Pierre wari mu izamu, Niyigena Clement, Nshimiyimana Yunussu, Niyomugabo Claude ari nawe Kapiteni, Byiringiro Jean Gilbert, Ronald Sekiganda, Dauda Yissif, Ruboneka Jean Bosco, Memel Dao, Mugisha Gilbert na William Togui.
Igice cya mbere cy’umukino cyagoye Pyramids, ku buryo APR yari ifite amahirwe yo kuyobora umukino no kugerageza uburyo bwinshi imbere y’izamu rya Pyramids.
Muri iki gice kandi ba myugariro bayo bagoye bikomeye ba rutahizamu ba Pyramids barimo Fiston Mayele, iki gice kirangira ari ibitego 0-0.
Ikice cya kabiri cyatangiye Pyramids yibonye mu mukino ndetse itangira kurusha APR FC, ndetse mu minota ine gusa Fiston Mayele afungura amazamu ku munota wa 49, nyuma y’amakosa yo gutakaza umupira yakozwe na Ronald Sekiganda.
APR FC ntiyacitse intege kuko yakomeje kugerageza uburyo imbere y’izamu aho yateye imipira igera kuri itatu yafashe umutambiko w’izamu, ndetse n’indi myinshi yakuwemo n’umuzamu wa Pyramids wari wababereye ibamba.
Taleb yakoze impinduka azana abarimo rutahizamu Mamadou Sy ngo ashake igitego wanagerageje kugora ba myugariro ba Pyramids anabona igitego ariko kitemewe kubera kurarira.
Ku munota wa 86 Fiston Mayele yongeye kuba indoto mbi kuri APR FC yongera gusetsa inshundura zari zihagazemo Ishimwe Pierre, igitego cya 2 cya Pyramids, imibare ikomeza kuba ibihekane kuri APR FC.
Gusa ntibyayibujije gukomeza kotsa igitutu mu izamu rya APR FC n’ubwo iminota umunani y’inyongera yababanye mike birangira Pyramids itsinze APR ibitego 2-0.
