Rutayisire Vianney, umunyarwanda wari rwiyemezamirimo akaba yarafungiwe muri gereza y’urwego rw’ubutasi bw’igisirikare cya Repubulika iharanira demukarasi ya Congo, Demiap ruherereye i Kinshasa yapfuye.
Ni amakuru yamenyekanye kuri uyu wa gatatu tariki ya 01 Ukwakira 2025, agaragaza ko uyu mugabo yaguye mu maboko y’urwego rw’ubutasi bw’igisirikare cya RDC.
Rutayisire Vianney wapfuye, amakuru agaragaza ko yafatiwe i Bukavu muri Kivu y’Amajyepfo, kandi ko yafashwe mu Ugushyingo mu mwaka wa 2022.
Yari akurikiranyweho ibyaha birimo gukorana n’umutwe wa M23 urwanya ubutegetsi bwa Perezida Felix Tshisekedi uyoboye iki gihugu kuva muri 2019.
Aya makuru anavuga kandi ko yafashwe nyuma yuko yari yatsindiye isoko ryo kubaka umwe mu mihanda yo muri iyi ntara ya Kivu y’amajyepfo.
Rutayisire Vianney apfuye ataragezwa imbere y’ubutabera ngo aburane kuko kuva icyo gihe yari agifungiye muri gereza ya Demiap.
Mu kwezi gushize Leta ya Repubulika iharanira demokarasi ya Congo yemeye kurekura imfungwa ifunze zizira umutwe wa M23, mu rwego rwo kubahiriza amasezerano impande zombi zasinyiye i Doha muri Qatar.
Ni mu masezerano RDC na AFC/M23 basinyiye i Doha imbere ya Leta zunze ubumwe z’amerika yo guhererekanya imfungwa nk’intambwe yo guhosha ubushyamirane ku ntambara ihanganishije impande zombi.
AFC/M23 isaba ubutegetsi bwa Perezida Felix Tshisekedi kurekura abantu bagera kuri 700 bafite aho bahuriye n’iri huriro. RDC nayo igasaba ko abasirikare 1,500 ba FARDC bafatiwe i Goma bakoherezwa mu kigo cya Rumangabo bakinjizwa muri AFC/M23 basubizwa Leta.
