Chairman w’ikipe ya APR FC, Brig. Gen. Deo Rusanganwa yasabye abakinnyi b’iyi kipe berekeje mu Misiri mu mukino wo kwishyura Pyramids FC, gukuba kabiri imbaraga bakoresheje mu mukino wabereye i Kigali.
Ni ubutumwa yageneye abakinnyi b’iyi kipe mbere yo kwerekeza mu Misiri ku munsi w’ejo ku wa kane, tariki ya 2 Ukwakira 2025.
Chairman wa APR yabwiye abakinnyi b’iyi kipe ko icyizere cyo kuba basezerera Pyramids FC akibona mu maso yabo, bityo ko bakwiye gukora ibirenze ibyo bakoreye i Kigali.
Ati “Icyizere kirahari, ndakibona mu maso yanyu. Mukwiye gukuba kabiri imbaraga mwatanze hano i Kigali kugira ngo mukore ibirushijeho.”
APR FC irasabwa gukora ibisa n’ibitangaza, igatsinda ibitego 3-0 kugirango ibashe gusezerera Pyramids FC yabatsindiye i Kigali ibitego 2-0, mu mukino ubanza wa CAF Champions League.
APR FC imaze gukina imikino itanu n’ikipe ya Pyramids FC, ariko ikaba itarabasha kuyitsindamo n’umukino n’umwe.
Umukino wo kwishyura wa APR FC na Pyramids FC uteganyijwe kuba, kuri iki Cyumweru, tariki ya 5 Ukwakira 2025, ku isaha ya 19h00 z’ijoro, ukazabera i Cairo mu Misiri kuri Stade ya 30th, June, yakira abantu ibihumbi 30.
Abakinnyi ba APR FC baraye berekeje mu Misiri
Brig. Gen. Deo Rusanganwa yabasabye gukuba kabiri imbaraga bakoresheje
