Abanyeshuri bagize Icyiciro cya 25 biga amasomo ajyanye n’imiyoborere y’ingabo mu Ishuri Rikuru rya Gisirikare rya Nyakinama, basuye Ingoro y’u Rwanda y’urugamba rwo kubohora igihugu ku Mulindi, mu rwego rw’urugendoshuri rujyanye no gusobanukirwa byinshi ku rugamba rwo kubohora igihugu.
Aba banyeshuri mu Ngabo z’u Rwanda basuye iyi ngoro iherereye mu Karere ka Musanze, ku wa kabiri, tariki ya 8 Ukwakira 2025.
Uru rugendoshuri rugamije gusura ahantu ndangamateka mu ntara zitandukanye z’u Rwanda, ahatangirijwe ndetse hakanabera ibyiciro by’ingenzi by’urugamba rwo kubohora igihugu rwagizwemo uruhare n’Ingabo zari iza RPA (Rwanda Patriotic Army).
Ni urugendoshuri kandi rufite intego yo gukomeza gutoza no kongerera ubumenyi ba ofisiye, binyuze mu masomo ajyanye n’urugamba ndetse bakanasobanukirwa byimbitse amateka y’urugamba rwo kubohora u Rwanda.
Aba banyeshuri bahawe ibiganiro na ba ofisiye bakuru bari mu kiruhuko cy’iza bukuru bagize uruhare mu rugamba rwo kubohora igihugu.
Babahaye ubuhamya bugaragaza imbogamizi bahuye na zo ku rugamba, n’ibyemezo bya gisirikare bagiye bafata bikagira uruhare mu gutsinda urugamba birimo ubuyobozi buhamye, imyitwarire myiza y’ingabo, uburyo bw’imirwanire ifite intego, gushyigikirwa n’abaturage ndetse n’umurava n’umuhate by’ingabo.
Aba banyeshuri bazakomeza gusura ibindi bice ndangamateka by’ingenzi bifitanye isano n’urugamba rwo kubohora igihugu ndetse n’urugamba rwo guhagarika Jenoside, kugira ngo barusheho gusobanukirwa amateka y’u Rwanda n’umurage w’amateka y’urugamba rwo kubohora igihugu.
