Umuyobozi Mukuru wa INES Ruhengeri, Myr Harorimana Vincent, yavuze ko ubwinshi bw’abasoza amasomo muri iyi Kaminuza bujyana n’ireme ry’uburezi n’uburere bahavana.
Ni ubutumwa yagejeje ku bitabiriye ibirori byo gutanga impamyabumenyi ku banyeshuri 1,479 basoje amasomo yabo mu mashami atandukanye muri iyi Kaminuza, kuri uyu wa Gatanu, tariki ya 31 Ukwakira 2025.
Abasoje amasomo barimo abagore 768 n’abagabo 711, mu gihe abanyamahanga ari 112 baturuka mu bihugu 21, akaba inshuro ya mbere mu mateka y’iri shuri hashoje icyiciro gifite umubare munini.
Umuyobozi Mukuru wa INES Ruhengeri, Myr Harorimana Vincent yavuze ko intego y’iri shuri ari ukujyanisha umubare n’ireme, ubuhanga, ubunyangamugayo n’ubupfura.
Ati “Intego yacu ni ukujyanisha ubwinshi n’ubwiza. Ubwinshi butagira umusururu ‘Oya’, ubwinshi bujyanye n’ubwiza, ‘Yego’.”
Yibukije abasoje amasomo ko guhabwa impamyabumenyi bisobanuye ko bize neza ibyari biteganyijwe, ariko ko bazakomeza kwigira ibindi mu buzima bwabo
Ati: “Mwushije ikivi, muteye intambwe mujya mbere, ariko urugendo rurakomeje, iyi ni intwambwe ihamagara izindi.”
Yabwiye abitabiriye ibi birori ko INES Ruhengeri ikomeye ku murongo w’uburezi wa Kiliziya Gatolika, wo guhuza kurera no gutanga ubumenyi n’ubushobozi.
Ati: “Bituma tugira abantu bashoboye kandi bashobotse, bashobora kwigirira akamaro, bakakagirira imiryango yabo, bakakagirira Kiliziya n’Igihugu.”
Abashyizwe ku isoko ry’umurimo barimo abahawe impanyabumenyi y’Icyiciro cya gatatu cya Kaminuza (Master’s degree) ndetse n’abahawe impamyabumenyi y’icyiciro cya kabiri cya Kaminuza (Bachelor’s degree).
INES-Ruhengeri yafunguye ku mugaragaro imiryango yayo ku itariki ya 17 Ugushyingo 2003, icyo yitwaga “Université Internationale au Rwanda (UNIR)”.
Gusa, igitekerezo cyo kuyishinga cyavutse mu kwezi kwa Nzeri 2000, kizanywe na Diyosezi Gatolika ya Ruhengeri.
Kugeza ubu mu byiciro 17 rimaze gutangamo impamyabumenyi, iri shuri rimaze gushyira ku isoko ry’umurirmo abagera ku 13,363.
