Umugaba Mukuru w’Ingabo zirwanira ku Butaka, Maj Gen Vincent Nyakarundi, yasuye Ikipe ya APR FC mu myitozo yitegura umukino w’umunsi wa karindwi wa Shampiyona y’u Rwanda [Rwanda Premier League], izakiramo Rayon Sports.
Ku mugoroba wo ku wa Kane, tariki ya 6 Ugushyingo 2025, ni bwo Maj Gen Vincent Nyakarundi yasuye abakinnyi ba APR FC mu myitozo yabereye kuri Stade Ikirenga iherereye i Shyorongi mu Karere ka Rulindo.
Uyu mukino w’ishiraniro, uhuza APR FC na Rayon Sports, uzwi nka ‘Derby y’Imisozi 1000’ uzabera muri Stade Amahoro, saa Cyenda zo ku wa Gatandatu, tariki ya 8 Ugushyingo 2025.
Mu butumwa yahaye abakinnyi, Maj Gen Nyakarundi, yabasabye kuzitwara neza no gushyira imbaraga mu gushaka amanota atatu.
Yagize ati “Muzatange ibishoboka kuri uriya mukino. Turabizi ko mufite ubushobozi kandi ubuyobozi bubari inyuma nkuko bisanzwe. Twizeye ko muzitwara neza.”
Maj Gen Nyakarundi yasuye APR FC ari kumwe na Chairman wayo, Brig Gen Deo Rusanganwa.
Umwuka muri APR FC umeze neza ndetse abakinnyi bariteguye guhatana usibye Raouf Memel Dao ufite imvune na Cheick Djibril Ouattara watangiye imyitozo nyuma y’igihe arwaye.
abandi bakinnyi bose bari gukora imyitozo yitegura uyu mukino tumaze imyaka irenga ibiri tutinjizwamo igitego.
APR FC iri ku mwanya wa munani muri Shampiyona y’u Rwanda, imaze gukinwa iminsi irindwi, aho ifite amanota umunani mu mikino ine imaze gukina mu gihe Rayon Sports ya kabiri ifite amanota 13, aho irushwa atatu na Police FC ya mbere zimaze gukina imikino itandatu.
