Abayobozi mu nzego z’igihugu bakomeje kwitabira gusuzumisha ibinyabiziga byabo imyuka ihumanya ikirere, batanga urugero rwiza ku Banyarwanda mu kubakangurira gukoresha iyi serivisi hagamijwe kurengera ibidukikije.
Kuri uyu wa Gatandatu, tariki ya 22 Ugushyingo 2025, Minisitiri w’Ubuzima, Dr. Sabin Nsanzimana n’Umunyamabanga wa Leta muri Minisiteri y’Uburezi, Irere Claudette na bamwe mu babarizwa muri Polisi y’Igihugu basuzumishije imodoka zabo mu kigo cy’isuzuma ry’ubuziranenge bw’ibinyabiziga cya Ndera.
Gusuzumisha ibinyabiziga imyuka ihumanya ikirere ni igikorwa kigamije kurwanya ihumana ry’ikirere, kwimakaza umutekano wo mu muhanda no kubungabunga ubuzima bw’abaturage.
Abayobozi basabye abaturage gukanguka bakitabira gusuzumisha ibinyabiziga byabo kugira ngo ibyotsi bihumanya ikirere n’ibindi byangiza ibidukikije bigabanuke, bityo igihugu gikomeze gutera imbere mu kurengera ibidukikije.
Tariki ya 1 Ugushyingo nibwo hatangijwe ku mugaragaro ubukangurambaga bwo bwo kurwanya imyotsi ihumanya ikirere, bwatangijwe ku mugaragaro ku kigo cy’isuzuma ry’ubuziranenge bw’ibinyabiziga kiri i Remera, ariko hari gahunda ko buzakomeza no mu gihugu hose.
Ubu bukangurambaga bugamije gushishikariza Abanyarwanda gusuzumisha ibinyabiziga byabo kugira ngo hagabanuke imyuka ihumanya ikirere, hubahirizwe amategeko ndetse hanabungabungwe ibidukikije.
Muri ubu bukangurambaga bwari bumaze amezi atatu, hampimwe ibinyabiziga 9118 mu bigo bitanu bikorerwamo ‘Contrôle Technique’ mu gihugu hose, muri byo ibinyabiziga, 77,4% ni byo byatsinze isuzuma, mu gihe 22,6% byatsinzwe bisabwa gukemura ikibazo cy’imyuka ihumanya ikirere bisohora.
Ku itariki ya 15 Ugushyingo, kandi hafunguwe ikigo gishya gisuzuma ubuziranenge bw’ibinyabiziga ndetse n’imyotsi isohorwa n’ibinyabiziga cya Ndera, cyaje cyunganira ‘Contrôle Technique’ ya Remera kuberako itabasha kwakira abantu benshi.
Iki kigo gishya gifite ubushobozi bwo gupima ibinyabiziga byikorera imizigo kuva kuri toni 3.5 kuzamura, ibinyabiziga bito na moto.
Umuvugizi wa Polisi y’u Rwanda, ACP Boniface Rutikanga, yavuze ko iki kigo gifite ubushobozi bwo kwakira ibinyabiziga 650 ku munsi, bikazafasha kugabanya umuvundo ku kigo cyari gisanzwe cya Remera no kwihutisha serivisi.
Kuri moto, gupima imyotsi bifata amasegonda 60 gusa, bigatuma abamotari bakomeza gahunda zabo bitabatindiye.
