Ikipe ya Al Hilal SC yateye utwatsi ibihano yafatiwe n’Ishyirahamwe ry’umupira w’Amaguru muri Afurika, CAF, nyuma y’imvururu zabaye ku mukino batsinzemo ikipe ya MC Alger ibitego 2-1, wabereye muri Stade Amahoro.
Mu ijoro rishyira uyu wa 28 Ugushyingo 2025, nibwo Al-Hilal Club yakiriye ibaruwa y’akanama gashinzwe imyitwarire muri CAF, iyimenyesha ko yafatiye ibihano umwe mu bakinnyi ngenderwaho b’iyi kipe, Jean Claude Girumugisha, birimo guhagarikwa imikino itatu no gucibwa amande y’ibihumbi bitanu by’idorari.
Iyi kipe ya Al-Hilal nayo yaciwe ibihumbi 15 by’idorari byose bituruka ku mvururu zabaye nyuma y’umukino wayihuje MC Alger yo muri Algeria, ufungura amatsinda ya CAF Champions League, wabereye muri Stade Amahoro, tariki ya 21 Ugushyingo 2025.
Jean Claude Girumugisha ufite inkomoko mu gihugu cy’u Burundi, ni umwe mu bakinnyi ngenderwaho b’iyi kipe, wanitwaye neza kuri uyu mukino baheruka gukina.
Nyuma yaho ubuyobozi bwa Al-Hilal bwatangaje ko butemeranya na busa n’ibi bihano bafatiwe nk’uko ibigaragaza mu butumwa yashyize ku rukuta rwayo rwa X.
Al Hilal ivuga ko bakorewe akarengane kandi bidakwiye kuko ibivugwa ntaho bihuriye n’ukuri kw’ibyabaye mu mukino, binahabanye na raporo ya Komiseri w’Umukino, ndetse n’uwari ushinzwe iby’umutekano.
Ati “Bombi bagaragarije mu mabaruwa yabo ko Jean Claude yirukankanwaga n’abatoza ndetse n’abakinnyi ba MC Alger bageragezaga no kumukubita.”
Ubuyobozi bwa Al-Hilal bukimenyeshwa iyi myanzuro, bwahise bufata icyemezo cyo kujurira muri CAF.
Al Hilala SC ifite imikino ikomeye mu mikino y’amatsinda ya CAF Champions League, igomba guhuramo n’amakipe arimo Saint Eloi Lupopo, ku Cyumweru tariki 30 Ugushyingo 2025 na Mamelodi Sundowns mu ntangiriro z’umwaka utaha.
Al Hlal SC Omdurman iri kubarizwa i Kigali mu Rwanda ari naho iri gukinira Shampiyona y’umwaka w’imikino wa 2025/22026, ikaba ari naho yakiriye imikino y’amatsinda ya CAF Champions League kugeza ubu.
