Jean Marie Vianney Ndayizigiye yagizwe Umunyamabanga Uhoraho muri Minisiteri y’Ubuzima mu gihe Amb. Fidelis Mironko yagizwe Umunyamabanga Uhoraho muri Minisiteri y’Ububanyi n’Amahanga n’Ubutwererane.
Inama y’Abaminisitiri yateranye ku mugoroba wo ku wa Gatanu, tariki 28 Ugushyingo 2025, ni yo yashyize mu myanya abayobozi mu nzego zitandukanye.
Ambasaderi Fidelis Mironko yagizwe Umunyamabanga Uhoraho muri Minisiteri y’Ububanyi n’Amahanga n’Ubutwererane, asimbuye Clementine Mukeka, wari kuri uyu mwanya kuva ku wa 11 Gicurasi 2020.
Amb. Fidelis Mironko afite ubunararibonye mu mibanire y’ibihugu n’iyo ku rwego mpuzamahanga ndetse n’urwego rwa politiki.
Yakoze mu nzego zitandukanye ku Mugabane w’u Burayi, Uburasirazuba bwo Hagati n’Amajyaruguru ya Amerika aho yahagarariye inyungu z’u Rwanda ndetse akanagura dipolomasi yarwo mu ngeri zitandukanye.
Amb. Fidelis Mironko yabaye Ambasaderi w’u Rwanda muri Türkiye; ndetse yahagarariye inyungu zarwo mu bihugu bya Kazakhstan, Azerbaijan, Lebanon & Jordan hagati ya 2020 na 2023. Yabaye umujyanama wa mbere muri Ambasade y’u Rwanda mu Bwongereza (2015–2020) ndetse aba umujyanama wa kabiri muri Ambasade y’u Rwanda i Washington DC (2010–2015).
Afite ubumenyi mu ngeri zitandukanye, aho afite Impamyabumenyi y’Icyiciro cya Gatatu cya Kaminuza mu bijyanye n’Imibanire Mpuzamahanga yakuye muri Western Illinois University muri Amerika aho yize mu 2005–2007 ndetse afite Impamyabumenyi y’Icyiciro cya Kabiri mu Mibanire Mpuzamahanga yaboneye muri St. Cloud State University yo muri Amerika (2002–2004) n’indi yakuye muri University of Massachusetts muri Boston (2000–2002).
Abandi bahawe inshingano barimo Jean Marie Vianney Ndayizigiye wagizwe Umunyamabanga Uhoraho muri Minisiteri y’Ubuzima. Kuri uyu mwanya yasimbuye Dr. Muhammed Semakula, wari muri izi nshingano kuva ku wa 16 Nyakanga 2025.
Ndayizigiye yari asanzwe ari Umuyobozi ushinzwe Igenzura ry’Umutungo muri Sosiyete y’Igihugu ishinzwe Ingufu, REG, kuva mu 2021. Yanabaye muri izi nshingano muri Unguka Bank Plc hagati ya Mata 2019 n’Ukwakira 2021.
Yize ibijyanye n’Ubukungu [Accounting Sciences] mu yahoze ari Kaminuza y’u Rwanda aho yakuye Impamyabumenyi y’Icyiciro cya Kabiri cya Kaminuza mu 2008, mbere yo kubona Impabumenyi y’Icyiciro cya Gatatu cya Kaminuza [Masters] muri Kaminuza y’u Rwanda [UR] mu 2015.
Agisoza amasomo ye, Ndayizigiye yabaye Umuyobozi Mukuru ushinzwe Igenzura ry’Umutungo [University Director of Internal Audit] muri UR hagati ya Nyakanga 2016 na Gashyantare 2019.
