Minisitiri w’Uburezi, Joseph Nsengimana yibukije ko umwarimu ari inkingi ya mwamba mu burezi bw’u rwanda ashimangira ko ireme ry’uburezi , ubumenyi n’ubushobozi igihugu gikomeza kugeraho byubakiye ku mbaraga n’ubwitange bya mwarimu.
Ibi yabigarutseho kuri uyu wa gatanu tariki ya 12 Ukuboza 2025, mu ijambo yagejeje ku barezi, abayobozi b’amashuri n’abandi bafatanyabikorwa mu burezi bitabiriye ibirori byo kwizihiza Umunsi Mpuzamahanga wa Mwarimu ku rwego rw’Igihugu.
Ni ibirori byabereye mu nzu ngari y’imyidagaduro y’Akarere ka Kirehe byahurije hamwe abarenga 1000 baturrutse hirya no hino mu gihugu, biganjemo abo muri aka karere.
Uyu munsi, usanzwe wizihizwa buri mwaka ku wa 5 Ukwakira, mu rwego rwo guha agaciro umurimo w ‘uburezi n’abawukora. Wizihijwe none mu rwego rwo gufatanya n’abarezi gusoza umwaka no kwizihiza iminsi mikuru inabinjiza mu mushya.
Wari ufite insanganyamatsiko igira iti: ‘Uburezi ni umwuga usaba ubufatanye’, ari yo Minisitriri Nsengimana ashingiraho yibutse abarezi, ababyeyi n’abafatanyabikorwa, ubufatanye mu burezi.
Ati: “Ubufatanye ni ngombwa kugirango tuzamure ireme ry’uburezi mu gihugu cyacu”.
Yashimangiye uruhare rukomeye abarezi bakomeje kugira mu kuzamura ireme ry’uburezi bw’u Rwanda n’iterambere ry’Igihugu muri rusange gikesha uburezi.
Yagize ati: “Umwarimu ni inkingi ya mwamba mu burezi bw’u rwanda. Ireme ry’uburezi , ubumenyi n’ubushobozi igihugu cyose gikomeza kugeraho byubakiye ku mbaraga n’ubwitange bya mwarimu.”
Minisitiri Nsengimana, yasabye abarezi gukomeza kwiyubaka, kwihugura no gushyira imbere uburere bw’umunyeshuri, asaba ababyeyi kubaha umwanya wo kwiga no gushishikariza abana gukunda ishuri.
Yasabye kandi ubuyobozi bw’Akarere n’inzego zibanze kunoza no gukurikirana imikorere y’amashuri.
Yasabye abafatanyabikorwa gukomeza gushishikarira ibikorwa birimo kubaka ibikorwaremezo by’amashuri, kubona ibikoresho mfashanyigisho no gutanga amahugurwa nzamurabushobozi.
Ati: “Ubwo bufatanye nibwo shingiro twubakiraho kugirango tuzateze imbere igihugu cyacu ndetse tugere ku ngamba twiyemeje nk’igihugu”
Yongeyeho ati: “Nta kabuza iyo ubu bufatanye buhari ireme ry’uburezi rirazamuka kandi umwana akiga neza”
Yashimye amashuri yitwaye neza mu bizamini bya L’età bisoza umwaka ushize abasaba gukomeza uwo muhate.
Ati: Uyu ni umusaruro watururtse mu mbaraga, umurava n’ubufatanye by’abarimu bacu.”
Akomeza agira ati: “Twahisemo guhurira hano kugirango tubashimire kandi tubakangurire gukomeza kuba indashyikirwa muri iki gikorwa.”
