Umunya-Tanzania, Diana Orembe, washinze akaba anayobora ikigo NovFeed, yegukanye igihembo nyamukuru cy’ibihumbi 300 by’amadorari, mu irushanwa rya ‘Africa’s Business Heroes’ (ABH), rishyigikira ishoramari ry’abakiri bato ku Mugabane wa Afurika.
Iri rushanwa ryari ribaye ku nshuro ya karindwi ryashorejwe muri Kigali Convention Centre, kuri uyu wa Gatandatu, tariki ya 13 Ukuboza 2025.
Ni irushanwa ryari rihuje ba rwiyemezamirimo 10 bo mu bihugu bitandukanye bya Afurika, bari batoranyijwe mu barenga ibihumbi 32, bari basabye kwitabira iri rushanwa.
Mu gusoza iri rushanwa akanama nkemurampaka kari kagizwe n’impuguke mpuzamahanga zirimo Jerry Yang, umwe mu bashinze ikigo cya Yahoo, Dr. Diane Karusisi, Umuyobozi Mukuru wa Banki ya Kigali, na Ibukun Awosika, umunyemari wo muri Nigeria washinze The Chair Center Group.
Aba ni bo basuzumye imishinga, bareba ubushobozi bwayo mu gukemura ibibazo byugarije Afurika.
Diana Orembe washinze ikigo NovFeed gitanga serivisi z’ubuhinzi bwifashishije Ikoranabuhanga niwe waje ku mwanya wa mbere, yegukana ibihumbi 300 by’amadorari.
Orembe yasobanuye ko umushinga wa NovFeed ugamije gukemura ikibazo cy’igiciro kiri hejuru cy’ibiryo by’amatungo, binyuze mu kubikora hifashishijwe ikoranabuhanga n’ubumenyi bwa siyansi, bigafasha aborozi bato kongera umusaruro, kugabanya igihombo no kubona inyungu.
Akanama nkemurampaka kavuze ko uyu mushinga wagaragaje igisubizo gifatika ku kibazo gikomeye cyugarije ubuhinzi n’ubworozi muri Afurika.
Ku mwanya wa kabiri haje umunya-Kenya, Abraham Mbuthia, washinze ikigo Uzapoint Technologies, mu gihe Adriaan Kruger wo muri Afurika y’Epfo, washinze ikigo cy’ubuvuzi cya NuvoteQ, yaje ku mwanya wa gatatu.
Ibihembo byatanzwe muri rusange kuri aba batatu n’abandi 10 bageze ku musozo, bifite agaciro ka miliyoni 1.5 z’Amadolari ya Amerika.
Abandi bageze mu cyiciro cya nyuma barimo abaturutse muri Kenya, u Rwanda, Tanzania, Sénégal, Misiri, Afurika y’Epfo na Cameroun.
U Rwanda rwari ruhagarariwe na Diane Mukasahaha, washinze ikigo DIKAM Ltd, gikora imyambaro no guteza imbere imideli.
Irushanwa rya Africa’s Business Heroes ryatangijwe n’itsinda rya Alibaba Group, rigamije gushyigikira ba rwiyemezamirimo b’Abanyafurika, guteza imbere imishinga ifite udushya no guhanga imirimo ku Mugabane wa Afurika.
U Rwanda rwishimiye kwakira iri rushanwa ku nshuro ya karindwi, ruaragaza ko igihugu gikomeje kuba igicumbi cy’udushya n’ubucuruzi muri Afurika, no gushyigikira urubuga ruhuza ba rwiyemezamirimo baturutse hirya no hino ku mugabane.
