Intumwa z’Ingabo z’Umuryango wa Afurika y’Iburasirazuba ziteguye gutabara mu Karere ka Afurika y’Iburasirazuba (Eastern Africa Standby Force – EASF), zasuye icyicaro cya Minisiteri y’Ingabo z’u Rwanda, hagamijwe kugenzura ibikoresho by’Ingabo zirwanira mu kirere.
Izi ngabo za EASF zari ziyobowe na Brig Gen Getachew Ali zasuye icyicaro cya RDF giherereye ku Kimihurura ku wa Kane, tariki ya 22 Mutarama 2026.
Bakiriwe n’Umuyobozi wungirije w’Ingabo zirwanira mu Kirere cy’u Rwanda (Air Force Deputy Chief of Staff), Brig Gen Godfrey Gasana wari uhagarariye Umugaba Mukuru w’Ingabo z’u Rwanda, Gen Mubarakh Muganga.
Uru ruzinduko rwari rugamije kugenzura ibikoresho by’Ingabo zirwanira mu kirere, RDF, yiyemeje gutanga.
Ibi biri gukorwa kugirango bizashyirwe mu gitabo ngenderwaho cy’ibikorwa bihuriweho bijyanye n’Ingabo zirwanira mu kirere bigamije ubutabazi, kiri gutegurwa na EASF.
Izi nyandiko z’ibikorwa bya EASF zerekana uburyo bwihuse bwo gukora ubutabazi bwo mu kirere, zikagaragaza imyitozo ihuriweho ikorwa n’izi ngabo, uburyo bwo kuvura abahuye n’ibikomere n’ibindi byinshi.
Nyuma y’iyi nama intumwa za EASF zasuye Urwibutso rwa Jenoside rwa Kigali, ruherereye ku Gisozi, basobanurirwa amateka yaranze Jenoside yakorewe Abatutsi mu 1994.
Nyuma yaho bashyize indabo ku rwibutso ndetse bunamira inzirakarengane zazize Jenoside yakorewe Abatutsi mu 1994, zihashyinguye.
