Umukinnyi w’Umunyarwanda ukina mu kibuga asatira, Hakim Sahabo, yamaze kwerekanwa nk’umukinnyi mushya w’ikipe ya AEK Athens ikina muri Shampiyona y’Icyiciro cya Mbere mu Bugereki.
Ikipe ya AEK Athens yifashishije imbuga nkoranyambaga zayo kuri uyu wa Mbere, tariki ya 2 Gashyantare 2026, yasangije amafoto yerekana ko Hakim Sahabo yamaze kuyinjiramo, ndetse baboneraho kumuha ikaze mu muryango mugari w’iyi kipe.
Mu butumwa basangije bagize bati” Hakim Sahabo abaye umwe mu bagize umuryango wa AEK.”
Hakim Sahabo w’imyaka 21 y’amavuko, yatangiye gukina umupira w’Amaguru nk’uwabigize umwuga mu 2022, icyo gihe yakiniraga ikipe y’abato ya Lille yo mu Bufaransa.
Nyuma yaho mu mpeshyi ya 2023, Sahabo yaje gusinyira ikipe ya Standard de Liege yo mu Bubiligi, gusa muri Mutarama 2025, iza kumutiza mu ikipe ya Beerschot yo mu Bubiligi ari nayo yakiniraga kuri ubu.
Hakim Sahabo ni n’umukinnyi w’ikipe y’igihugu Amavubi, aho amaze kuyikinira imikino irenga 10 kuva mu Gushyingo 2022 ubwo makinga yakinaga umukino wa mbere.
AEK Athens yakiriye Hakim Sahabo ni imwe mu makipe akomeye mu Bugereki, ndetse kuri ubu iyoboye urutonde rwa Shampiyona y’icyiciro cya Mbere yitwa Greece Super League, n’amanota 45.
Hakim Sahabo agiye gukinana n’abakinyi bafite amazina akomeye muri ruhago y’Isi barimo, umunya-Portugal João Mário wakiniye ikipe y’iki gihugu cye ndetse ari mu bakinnyi batwaye igikombe cy’Uburayi cya 2016.
Uyu mukinnyi yakinanye n’abandi bakinnyi b’ibikonyozi muri ruhago barimo Cristiano Ronaldo, Pepe, Nani, Ricardo Quaresma, Rui Patrício n’abandi
Sahabo agiye gukinana kandi n’abarimo Damagoj Vida, umunya-Croatia wakinnye umukino wa nyuma w’igikombe cy’Isi cya 2018, Luca Jovic wakiniye amakipe arimo Real Madrid, n’abandi benshi.
