Umutwe wa AFC/M23 winjije mu gisirikare abandi basirikare bashya 7,532, nyuma yo gusoza amahugurwa n’imyitozo mu kigo cya gisirikare cya Tshanzu, kiri mu gace ka Rutshuru mu Ntara ya Kivu y’Amajyaruguru.
Uyu muhango wabaye ku Cyumweru tariki ya 8 Gashyantare, uyoborwa n’umuyobozi w’ingabo z’uyu mutwe, Maj Gen Sultani Makenga.
Abo basirikare bashya binjijwe mu gisirikare cya Armée révolutionnaire congolaise (ARC), nyuma yo gusoza amahugurwa abategura kujya ku rugamba.
Aba basirikare bashya barenga ibihumbi birindwi barahiriye kurengera inyungu za Repubulika Iharanira Demokarasi ya Congo na AFC/M23 n’igihugu cyahungabanyijwe n’imiyoborere y’ivangura ya Kinshasa.
Muri uyu muhango, aba basirikare berekanye ubumenyi bahawe burimo imyitozo njyarugamba, imyitozo ngororamubiri, ubuhanga bwo kwirwanaho (martial arts) n’ibindi bigaragaza ko biteguye inshingano binjiyemo.
Mu ijambo rye, Gen Makenga yagarutse ku ntego ya AFC/M23 n’igisirikare cyayo cya ARC, avuga ko ari imbaraga zigamije gusubiza igihugu agaciro no kurinda abasivili.
Yakomeje avuga ko ubutegetsi buri i Kinshasa bugaragaza ivangura, kudaha agaciro abaturage no kunanirwa inshingano za politiki.
Asobanura ko intego yo gushinga umutwe wa AFC/M23 yaturutse ku ihohoterwa n’akarengane byakorerwaga abaturage, bigatuma benshi bahunga igihugu cyangwa bakava mu byabo.
Yanavuze ko abasirikare basanzwe ku mirimo bagiye bitwara neza, aho bagiye bagaragaza gutsinda intambara bari bahanganyemo n’ingabo za Leta n’indi mitwe bafatanyije.
Nk’uko abayobozi ba AFC/M23 babitangaje, umwaka wa 2025 waranzwe no kwiyongera kw’abinjira mu gisirikare cy’uyu mutwe, kandi biteganyijwe ko iyo mibare izakomeza kwiyongera no mu 2026.
