Ikipe ya Al Hilal SC yatsinze APR FC ibitego 2-0 mu mukino w’ikirarane w’umunsi wa 15 wa Shampiyona y’Icyiciro cya mbere y’u Rwanda ‘Rwanda Premier League’.
Ni umukino wabaye kuri uyu wa Kabiri, tariki ya 10 Gashyantare 2026, kuri Kigali Pele Stadium i Nyamirambo.
APR FC yaherukaga mu kibuga igwa miswi na Bugesera FC mu mukino w’umunsi wa 19 wa Shampiyona y’u Rwanda, ni mu gihe Al Hilal SC yo yaherukaga gutsindwa na MC Alger mu mukino w’umunsi wa gatanu w’amatsinda ya CAF Champions League.
Iyi kipe y’Ingabo z’u Rwanda yari yakoze impinduka mu bakinnyi b’abanzamo aho kapiteni wayo Niyomugabo Claude yabanje hanze kubera uburwayi bwa Malaria, akorerwa mu ngata na Hakim Bugingo.
Umuzamu Ishimwe Pierre uherutse kwitwara nabi ku mukino wa Bugesera FC, yahanishijwe gukorera imyitozo mu ikipe y’abato ya APR FC, akaba yari yasimbuwe na Adolphe Hakizimana na Memel Dao wari ku ntebe y’abasimbura, naho Dauda agaruka mu bakinnyi 11 b’abanzamo.
Ku ruhande rwa Al Hilal SC umutoza Laurentiu Reghecampf, yari yakoze impinduka nyinshi mu bakinnyi basanzwe b’abanzamo aho abarimo Girumugisha Jean Claude, Omer, Ebouela, n’abandi bari babanje hanze mu rwego rwo kubategurira umukino w’umunsi wa gatandatu w’amatsinda ya CAF Champions League, aho iyi kipe izahura ba Saint Eloi Lupopo, mu mukino uteganyijwe ku wa Gatandatu, tariki ya 14 Gashyantare 2026, kuri Stade Amahoro.
Uyu mukino wari ufite ubwitabire buri hejuru watangiranye imbaraga nyinshi, aho umusore Adama Coulibaly wa Al Hilal SC yatangiye azamukana umupira, Dauda Seidu Yussif wa APR FC agerageza kumuhagarika biba iby’ubusa arawukomezanya, gusa birangira awirengereje.
Bidatinze Al Hilal yaje kubona ‘coupe franc’ ku munota wa 23′ iterwa na El Hadji Madicke waruhukirije umupira mu rushundura, Al Hilal iba yanditse igitego cya mbere mu minota mike.
Abasore ba APR FC bahise bakanguka batangira gusatira babona uburyo butandukanye burimo aho Djibril Ouattara yasigaranye n’umuzamu wenyine ariko ateye ishoti riremereye umupira urenga izamu hejuru.
Rutahizamu wa APR FC William Togui yabonye ubundi buryo ku mupira mwiza watunganyijwe na Byiringiro Jean Gilbert “Kagege”, ariko Togui ateye n’umutwe umupira urenga izamu.
Al Hilal yanyuzagamo igasatira ndetse ibona uburyo bubiri bwiza bw’ibitego aho Adama Coulibaly ndetse na Emmanuel Flomo bagiye basigarana n’umuzamu Hakizimana Adolphe, ariko batera imipira akayikuramo.
Igice cya mbere cyarangiye Al Hilal yibitseho igitego 1-0 bwa APR FC.
Igice cya kabiri cyagarukanye impinduka ku ruhande rwa Al Hilal aho Girumugisha Jean Claude yahise yinjiramo asimbuye Adama Coulibaly mu rwego rwo gukomeza ubusatirizi bw’iyi kipe.
Ku ruhande rwa APR FC yatangiranye umuvuduko mwinshi aho wabonaga ko Al Hilal yasubiye inyuma iri gucungire kuri ‘contre attaq’. Abasore ba APR FC bagiye babona uburyo burimo ishoti riremereye cyane ry’umupira wo hasi watewe na Dauda Seidu Yussif ariko unyura iruhande rw’izamu.
Umutoza wa APR FC Abderrahim Taleb yakoze impinduka ku munota wa 68′ yinjizamo Mamadou Sy, Memel Dao basimbura Cheikh Djibril Ouattara na Ruboneka Jean Bosco. Ku munota wa 83′ yinjijemo Mugisha Gilbert “Barafinda” asimbuye William Mel Togui.
Ku munota wa 77′ Al Hilal yabonye koruneli ariko ba myugariro ba APR FC bakuraho umupira usanga abakinnyi ba Al Hilal bahita bawuha nomero 30 w’iyi kipe, Kindness Cole, awucomekera Girumugisha, uyu musore ahita atunganya umupira mwiza usanga rutahizamu Emmanuel Flomo, atazuyaje ahita awunyereza mu nshundura, Al Hilal iba itsinze igitego cya kabiri.
Abakinnyi ba APR FC bagerageje kureba ko babona byibura igitego kimwe ariko amahirwe ntiyabasekera, umukino wongejwe iminota 6′ itigeze igira icyo ihindura ku migendekere y’umukino, maze umusifuzi Ishimwe Jean Claude asifura ko umukino urangiye, Al Hilal icyura amanota atatu.
Nubwo APR FC yatakaje uyu mukino,abafana b’iyi kipe bavuze ko banyuzwe n’imikinire yayo kuko iyo bahuye yari ikomeye ndetse yagiye yandagaza andi makipe ariko ikaba itabatsinze ibitego byinshi.
APR FC yahise ijya ku mwanya wa kabiri ku rutonde rwa Shampiyona n’amanota 37, ni mu gihe Al Hilal yahise ifata umwanya wa mbere n’amanota 38.
Mu mikino ikurikiyeho ya Shampiyona, Police FC izahura na Rayon Sports ku wa Gatanu, tariki ya 13 Gashyantare, ni mu gihe APR FC izahura na Kiyovu Sports ku wa Gatandatu, tariki ya 14 Gashyantare 2026.
