Madamu Jeannette Kagame yitabiriye igitaramo cya Art-Rwanda Ubuhanzi Xperience no gusoza icyiciro cya Gatatu cy’amarushanwa ya Art-Rwanda Ubuhanzi agamije gushyigikira no guteza imbere impano z’urubyiruko mu buhanzi.
Ni igitaramo cyabaye kuri uyu wa Gatanu tariki ya 13 Gashyantare 2026, gitegurwa na Imbuto Foundation, gihuza abahanzi batandukanye banyuze mu marushanwa ya Art-Rwanda Ubuhanzi.
Iki gitaramo Cyabereye muri Kigali Conference and Exhibition Village (KCEV) cyitabiriwe n’abayobozi batandukanye n’urubyiruko rwanyuze muri gahunda ya Art-Rwanda mu myaka itandukanye.
Umuyobozi Mukuru wa Imbuto Foundation, Elodie Shami, yavuze ko “Art-Rwanda Ubuhanzi ni kimwe mu bikorwa bya Imbuto Foundation, bigamije guteza imbere urubyiruko no kurwubakira ubushobozi binyuze mu kwagura impano zabo z’ubuhanzi.”
Yongeyeho ko “Tuba tugamije gufasha abahanzi baza muri iyi gahunda babasha gukoresha impano zabo, bagahanga n’imirimo ishingiye ku buhanzi.”
Yerekanye ko muri icyo gitaramo hizihizwa ubuhanzi mu byiciro bigera ku icyenda ndetse hakabaho no guhemba abahize abandi mu cyiciro kigiye gusozwa.
Kuva Art-Rwanda Ubuhanzi yatangira, imaze gufasha abahanzi 174 mu ngeri z’ubuhanzi icyenda zitandukanye, aho yagiye ibafasha kwagura impano zabo binyuze mu kubaha ubumenyi, ibikoresho, amahugurwa no gufashwa kugera ku isoko ry’ibyo bakora.
Icyiciro cya gatatu kigiye gusozwa kigizwe n’abahanzi 46 bari mu ngeri zitandukanye.
Mu 2025 Art-Rwanda yafashije abahanzi kwinjiza miliyoni 103 Frw, ibishimangira ko ubuhanzi bushyizwemo imbaraga bwateza imbere ababukora.
Hahembwe abahize abandi muri iki cyiciro cya gatatu
Mu cyiciro cya Gatatu cya Art-Rwanda Ubuhanzi, abanyempano 46 ni bo basoje amahugurwa bakuwe mu bandi bari bahatanye mu gihugu hose.
Abasoje amahugurwa, bahabwa impamyabumenyi nyuma y’umwaka bari bamaze bahugurwa ndetse abahize abandi mu byiciro bitandukanye bakegukana igihembo cya miliyoni 1 Frw.
Mu bahembwe, ku cyiciro cy’umuziki hahembwe Nezerwa Ukwishatse, mu kubyina hahembwa Hirwa Christian, mu gukora filimi hatsinda Gisa Innocent, mu cyiciro cya Classic Art igihembo cyegukanywe na Bayingana Andy, mu mideli hahembwa Ndayishimiye Kamali Jimmy, gukina ikinamico (Art and Drama) hahembwe Akimana Priscilla mu gihe mu Buvanganzo hahembwe Niyere Milliam.
