Perezida Paul Kagame, kuri uyu wa Gatanu tariki ya 20 Gashyantare 2026, yakiriye Umunyamabanga Mukuru w’Umuryango wa Afurika y’Iburasirazuba (EAC),Veronica M. Nduva uri i Kigali mu nama yateguwe n’uyu muryango .
Ni inama igamije kureba imbogamizi zikomeje kudindiza ubucuruzi hagati y’ibihugu bigize uyu muryango no gushimangira ishyirwa mu bikorwa rya Gasutamo ihuriweho n’Isoko rusange ry’uyu muryango.
Ibiro by’Umukuru w’Igihugu,Village Urugwiro, byatangaje ko ” Ibiganiro byabo byibanze ku guteza imbere ubucuruzi n’ubwuzuzanye mu karere, ndetse n’imishinga igamije guteza imbere imibereho myiza n’iterambere rya bose muri uyu muryango.”
Ubucuruzi hagati y’ibihugu by’Umuryango wa Afurika y’Iburasirazuba buracyari munsi ya 15%.
Imibare igaragaza ko mu 2017 ibihugu bya EAC byacuruzanyije agera kuri miliyari 3.2$ bigera mu 2023 ageze kuri miliyari 6.3$.
Umusaruro mbumbe w’ibihugu bya EAC wavuye kuri miliyari 87$ mu 1990 ugera kuri miliyari 293$ mu 2023, ndetse byitezwe ko mu 2043 uzaba ugeze kuri miliyari 954$.
