APR BBC igiye kwitabira imikino ya Shampiyona ya Basketbal yo gushaka itike y’iya kamarampaka izabera i Kigali muri Gicurasi.
APR BBC iri mu makipe 12 yatangajwe na BAL azitabira iri rushanwa rigiye kuba ku nshuro ya gatandatu.
Aya makipe yagabanyijwe mu matsinda abiri (Conferences), aho buri tsinda rigizwe n’amakipe atandatu. Buri tsinda rizakina imikino 15, aho buri kipe izahura n’andi makipe atanu bari mu itsinda rimwe, inshuro imwe.
APR iri mu itsinda rya Kalahari rizakinira i Pretoria muri Afurika y’Epfo kuva tariki ya 23 Werurwe- 5 Mata, iri kumwe na Johannesburg Giants yo muri Afurika y’Epfo, Al Ahly Ly yo muri Libya, Dar City yo muri Tanzania, Nairobi City Thunder yo muri Kenya na Petro de Luanda yo muri Angola.
Itsinda rya kabiri rya Sahara rizakinira i Rabat muri Morroco guhera tariki ya 24 Mata – 3 Gicurasi ririmo Fus de Rabat yo muri Morroco, Al Ahly yo muri Misiri, Ville de Dakar yo muri Senegal, JCA Kings yo muri Cote d’Ivoire, Club Africans yo muri Tunisia na Maktown flyers yo muri Nigeria.
Amakipe umunani yo mu matsinda yombi azaba yitwaye neza kurusha andi azabona itike yo gukina imikino ya kamarampaka (Playoffs) izabera i Kigali, kuva ku wa Gatanu, tariki ya 22 Gicurasi kugeza ku ya 31 Gicurasi.
APR BBC yahagarariye u Rwanda no mikino iheruka ya BAL, yari yageze mu mikino ya playoffs izamutse mu itsinda rya Nile Conference, nyuma yo gutsinda Rivers Hoopers amanota 104-73 mu mukino wa ¼ , gusa iza gutsindwa 84-71 na Al Ahli Tripoli mu mukino wa ½.
Iyi kipe y’Ingabo z’u Rwanda yasoje ku mwanya wa gatatu mu irushanwa nyuma yo gutsinda Al Ittihad Alexandria 123-90.
Shampiyona ya Basketball Africa League (BAL) iheruka ya 2025 yakira abafana barenga 140,000 ku bibuga, ndetse inatanga umusaruro w’arenga miliyari 1.2 aturutse ku mbuga nkoranyambaga za National Basketball Association (NBA) na BAL.
