Ingabo z’u Rwanda (RDF) ziri mu butumwa bw’ubutabazi n’ubwubatsi muri Jamaica, zifatanyije n’abasirikare bashinzwe ubwubatsi bo muri Jamaica (JDF Engineers), mu gikorwa cy’Umuganda bakoreye mu kigo Blessed Assurance Institution cyita ku bana bafite ubumuga.
Uyu muganda wakozwe mu rwego rw’ibindi bikorwa byo gufasha abaturage bibasiwe n’ingaruka z’umuyaga ukomeye wa Melissa.
Ingabo z’u Rwanda (RDF) ziri muri Jamaica guhera ku itariki ya 14 Mutarama 2026, mu butumwa bw’ubutabazi n’ubwubatsi, aho hoherejwe abasirikare 100 barimo abenjenyeri (Engineers), gufasha icyo gihugu gusana ibyangijwe n’inkubi y’umuyaga yibasiye agace ka Caraïbes mu mpera z’umwaka wa 2025.
Muri uwo muganda, Ingabo z’u Rwanda n’iza Jamaica zifatanyije n’abakozi b’Ibitaro bya Kaminuza ya West Indies, ishami rya Tony Thwaites Wing, basiga amarangi mu cyumba cy’abanyeshuri ndetse bashyiramo amashanyarazi (electric ceiling fans) mu byumba abana bararamo (dormitories).
Byari ibikorwa bigamije kunoza imibereho n’imyigire y’aba bana barererwa muri iki kigo kiri mu muryango wa Mustered Seed Communities.
Ubuyobozi bw’ikigo Blessed Assurance Institution bwashimye iki gikorwa, bavuga ko cyahinduye isura y’ikigo, kikaba kinongereye ihumure ku bana n’abakozi bahakorera.
Umuyobozi w’itsinda ry’Ingabo z’u Rwanda ziri muri Jamaica, Col. Moses Kayigamba, yashimangiye ko ubu butumwa bugaragaza ubufatanye n’ubumwe hagati y’ibihugu byombi.
Ingabo z’u Rwanda zifatanya n’ingabo za Jamaica (JDF), mu gusana inzu z’abaturage, ibigo by’amashuri, n’ibindi bikorwa remezo by’ingenzi byari byarangijwe n’uyu muyaga wa Melissa.
Ingabo z’u Rwanda ziri mu bikorwa by’ubutabazi muri Jamaica zakoze umuganda wo gusiga amarangi mu kigo cy’abafite ubumuga
Banasannye amatara yo mu byumba abakozi bararamo
