Ikipe ya St Aloys y’i Rwamagana y’abakobwa n’iya Gisagara Volleyball Academy y’abahungu zegukanye igikombe cya Shampiyona y’abato mu mwaka w’imikino wa 2025-2026.
Iyi mikino izwi nka Rwanda National Volleyball Junior League cyangwa FRVB Junior League, yasorejwe i Kigali, ku Cyumweru, tariki ya 1 Werurwe 2026.
Mu cyiciro cy’abakobwa, ikipe ya St Aloys Rwamagana yegukanye igikombe nyuma yo gutsinda St Bernadette amaseti 3-0 ku mukino wa nyuma.
Iyi ni inshuro ya gatatu, ikipe ya St Aloys Rwamagana yegukanye igikombe mu mikino ya nyuma ya Shampiyona ya Volleyball y’abato, bigaragaza ubuhanga bw’iri shuri muri uyu mukino w’intoki.
Undi mukino warurimo ihangana rikomeye, ni uwo guhatanira umwanya wa gatatu wahuje Lycée de Nyanza na St Joseph y’i Kabgayi, wasize Lycée de Nyanza iwegukanye.
Mu cyiciro cy’abahungu, Gisagara Volleyball Academy nayo yegukanye igikombe itsinze Petit Séminaire Virgo Fidelis amaseti 3-1.
Ni ku nshuro ya kabiri yikurikirana Gisagara Volleyball Academy yegukanye igikombe muri Shampiyona y’abato.
Mu mukino wo guhatanira umwanya wa gatatu, Groupe Scolaire Officiel de Butare (GSO Butare) yatsinze Nyanza TSS amaseti 3-2, mu mukino wari ishiraniro.
Shampiyona y’Abato ya Junior League ni irushanwa ngarukamwaka ritegurwa ku bufatanye bw’ibigo by’amashuri na Federasiyo y’umukino wa Volleyball mu Rwanda.
Shampiyona y’uyu mwaka yatangiye mu Kwakira 2024, ihuza amakipe 19 arimo atanu y’abakobwa na 14 y’abahungu. Itegurwa hagamijwe gukomeza kuzamura impano no guteza imbere umukino wa Volleyball mu Rwanda.
St Aloys y’i Rwamagana y’abakobwa yegukanye igikombe cya Shampiyona y’abato ya 2024/25
Gisagara Volleyball Academy y’abahungu yegukanye Igikombe cya Shampiyona y’abato ya 2024/25
St Aloys Rwamagana yegukanye igikombe nyuma yo gutsinda St Bernadette
Gisagara Volleyball Academy nayo yegukanye igikombe itsinze Petit Séminaire Virgo Fidelis
Abafana bari bitabiriye ku bwinshi imikino ya nyuma ya Shampiyona y’abato ya Volleyball ya 2024/25
