Umugabo witwa Dushimyumuremyi Fulgence, ukomoka mu Karere ka Muhanga, yatawe muri yombi n’urwego rwa Polisi, akurikiranyweho kwiyita komanda wayo, agasahura abacukuzi amabuye y’agaciro yitwaje umuhoro.
Dushimyumuremyi Fulgence yatawe muri yombi ku Cyumweru, tariki ya 22 ukuboza 2024, akaba yarafatiwe mu Mudugudu wa Vugo, Akagari ka Rusovu, Umurenge wa Nyarusange, Akarere ka Muhanga.
Uyu ukekwaho ubujura yitwaje intwaro gakondo, yabikoraga yiyita ko ari komanda wa Polisi, yaje gutahurwa atabwa muri yombi, kuri ubu akaba afungiwe kuri sitasiyo ya Polisi, iherereye mu Murenge wa Nyamabuye.
Umunyamabanga Nshingwabikorwa w’Umurenge wa Nyarusange Ndayisaba Aimable ubwo yavuganaga n’UMUSEKE yemeye aya makuru, ati“Nibyo yari amaze iminsi ajyana ibitero mu Kigo cya EMITRA, ariko turashimira Polisi yamufashe.”
Yakomeje avuga uyu mugabo akimara gufatwa yatangaje ko hari ibindi bigo yateganyaga gukoramo ibi bikorwa by’ubujura, kuri uyu wa mbere, tariki ya 23 Ukuboza.
Abaturage batuye muri aka gace bavuga ko uyu Dushimyumuremyi Fulgence (Komanda), yari yarajujubije abaturage bakora mu birombe by’amabuye y’agaciro abambura ibyo baruhiye, yitwaje izina rya Polisi y’u Rwanda, ndetse ko bishoboka ko hari abandi bantu bakoranaga batafashwe.
