Mu myaka itatu ishize, umushinga wa AGUKA umaze kugaragaza mu buryo bufatika ko ishoramari rito rishyizwe mu rubyiruko rufite ibitekerezo by’iterambere rishobora kubyarira inyungu nini ubukungu bw’igihugu n’abaturage muri rusange.
Ibi bishimangirwa n’imibare yashyizwe ahagaragara ku wa Kabiri, tariki ya 17 Werurwe 2026, igaragaza ko AGUKA yageze ku musaruro uri hejuru cyane ugereranyije n’ishoramari ryakoreshejwe.
Mu ishoramari rusange rya miliyoni 628 Frw, buri miliyoni 1 Frw yashowe yabyaye hafi miliyoni 54.2 Frw mu yinjiye mu bikorwa by’ubucuruzi, inyungu ingana na miliyoni 15.8 Frw, ndetse itanga imisoro ingana na miliyoni 3.6 Frw.
Iyo miliyoni imwe kandi yatumye haboneka imirimo 48 y’urubyiruko, bigaragaza neza agaciro k’ishoramari ryashyizwe muri uyu mushinga.
Umushinga wa AGUKA ni ikimenyetso cy’uko gushyigikira urubyiruko bishobora guhindura ubukungu bw’igihugu mu buryo burambye.
Ushyirwa mu bikorwa ku bufatanye bw’inzego zitandukanye zirimo Minisiteri y’Urubyiruko n’Iterambere ry’Ubuhanzi (MoYA), Ishami ry’Umuryango w’Abibumbye rishinzwe Iterambere (UNDP), Umuryango w’Ubumwe bw’u Burayi (EU), ndetse n’Umuryango wa Tony Elumelu (TEF).
Ubu bufatanye bwatumye uyu mushinga ugera kuri benshi, hagamijwe gufasha urubyiruko rw’u Rwanda rufite ibitekerezo by’ubucuruzi kubihindura imishinga ibyara inyungu.
Kimwe mu by’ingenzi AGUKA itanga ni igishoro cyo gutangira umushinga kizwi nka “seed capital”, aho buri mwaka ba rwiyemezamirimo 100 batoranywa bagahabwa inkunga ingana na $3,000 (asaga miliyoni 4 Frw).
Iyi nkunga ibafasha gutangiza cyangwa kwagura imishinga yabo, cyane cyane ku rubyiruko rutoroherwa no kubona ingwate zo gusaba inguzanyo muri banki.
Uretse igishoro, abitabira AGUKA bahabwa amahugurwa yimbitse binyuze ku rubuga rwa TEFConnect, aho biga ibijyanye no gukora ubucuruzi, imikoreshereze y’imari ndetse no kwamamaza ibikorwa byabo. Ibi bibaha ubushobozi bwo guhangana ku isoko no guteza imbere imishinga yabo mu buryo bunoze.
Ikindi kintu cy’ingenzi ni ubujyanama (mentorship), aho bahuzwa n’inzobere mu bucuruzi zibafasha kunoza imishinga yabo no guhangana n’imbogamizi zitandukanye. Abahawe ubu bufasha bagaragaje ko batanga umusaruro uri hejuru ugereranyije n’abatabubonye.
Mu rwego rw’umusaruro w’iyi gahunda, ibigo byatewe inkunga na AGUKA byinjije arenga miliyari 34 Frw, bitanga inyungu zibarirwa hafi muri miliyari 10 Frw, ndetse bitanga imisoro igera kuri miliyari 2.25 Frw. Ibi bigaragaza ko ibyo bigo bifite ubushobozi bwo gukomeza kwiyubaka no kongera gushora imari mu bikorwa byabyo.
Ku bijyanye n’imirimo, AGUKA yagaragaje uruhare rukomeye mu gufasha urubyiruko kubona akazi no kwihangira imirimo.
Kuva mu 2022 kugeza muri Gicurasi 2025, imaze kurema imirimo irenga ibihumbi 128, harimo irenga ibihumbi 30 y’imirimo ihoraho.
Icyakora nubwo bimeze bityo, haracyari imbogamizi zijyanye n’ubuziranenge bw’imirimo, kuko igice kinini cyayo kikiri iy’igihe gito cyangwa idahoraho.
