Umuhanda munini uhuza Muhanga – Ngororero – Mukamira wafunzwe by’agateganyo, bitewe n’imvura nyinshi yaguye ikawangiza.
Nk’uko byatangajwe na Polisi, iyi mvura yateje isenyuka ry’ibice by’umuhanda ndetse n’imyuzure ishobora gushyira ubuzima bw’abawukoresha mu kaga.
Mu rwego rwo kwirinda impanuka no kurinda ubuzima bw’abaturage, hafashwe icyemezo cyo gufunga uyu muhanda by’agateganyo, mu gihe ugisanwa kugirango wongere gukoreshwa.
Abatwara ibinyabiziga basabwe gukoresha indi mihanda irimo inzira ya Mukamira – Musanze – Kigali, Muhanga – Kigali – Musanze – Mukamira, ndetse na Muhanga – Rubengera – Rutsiro – Rubavu.
Polisi y’u Rwanda yanatangaje ko abapolisi bashyizwe kugira ngo bayobore abatwara ibinyabiziga, babafashe kubereka inzira no kwirinda impanuka.
Abaturage basabwe gukomeza gukurikiza amabwiriza bahabwa n’inzego zibishinzwe, kwitwararika mu gihe cy’imvura nyinshi, no gukomeza gutanga amakuru ku gihe mu gihe babonye ikibazo icyo ari cyo cyose gishobora guhungabanya umutekano wo mu muhanda.
