Abagande batandatu batawe muri yombi ndetse bategerejwe gushyikirizwa urukiko kuri uyu wa 23 Werurwe 2026, bakurikiranyweho uruhare mu mugambi w’uburiganya bwifashishije ikoranabuhanga bwambukiranya imipaka, bwibasiye Banki ya Equity mu Rwanda.
Ikinyamakuru Ceo East African Magazine dukesha iyi nkuru, cyatangaje ko inyandiko z’ikorwa ry’ikirego (charge sheet) za Polisi ya Uganda, aba bakekwaho icyaha bashinjwa kwinjira mu buryo butemewe muri sisitemu za banki ya Equity Bank Rwanda,
Iki kinyamakuru kigaragaza ko inyandiko za Polisi zigaragaza ko abakekwaho icyaha, bafatanyije n’abandi batarafatwa, bakekwaho kuba barakoze ibi byaha hagati ya tariki ya 14 na 18 Gashyantare 2026. Abafashwe basanzwe bakorera ibikorwa byabo mu bice bitandukanye birimo Umujyi wa Kigali mu Rwanda na Kampala muri Uganda.
Ku wa 15 Werurwe 2026, Ubuyobozi bwa Banki ya Equity y’u Rwanda bwatangaje ko bamenye amakuru yari ari gukwirakwira ajyanye n’ibikorwa by’uburiganya byageragejwe gukorwa binyuze mu bikorwa bimwe by’ihererekanya ry’amafaranga muri banki.
Mu itangaza bashyize hanze bagize bati: “Sisitemu zacu zo kugenzura ibikorwa zabonye ibikorwa by’ihererekanya ry’amafaranga bidasanzwe, maze hahita hatangizwa ingamba z’umutekano n’uburyo bwo gukemura ibibazo hakurikijwe amabwiriza y’imikorere n’imicungire.”
Iyi Banki yavuze ko hafashwe ingamba zihuse zo guhagarika icyo kibazo, ndetse ikorana bya hafi n’inzego zibishinzwe. Binyuze muri izi ngamba, Equity Bank yavuze ko igice kinini cy’amafaranga yari yiyohererejwe yabashije kugaruzwa mu gihe kitarenze amasaha 24.
Equity Bank ivuga ko ibyabaye bitagize ingaruka ku bakiriya bayo, ndetse iboneraho kubahumuriza ibabwira ko amafaranga na konti byabo bitekanye mu gihe iperereza ku kibazo cyabaye ryari rikomeje.
Ati “Turifuza guhumuriza abakiriya bacu n’abafatanyabikorwa ko amafaranga y’abakiriya n’amakonti yabo bikomeje kurindwa neza, kandi ibikorwa bya banki bikomeje nk’ibisanzwe. Nta mafaranga y’abakiriya yigeze abura.”
Amakuru agaragaza ko mu bihe bitandukanye hari ibindi byaha byinshi byagiye bigaragara byibasira Equity Group mu karere, birimo ibifitanye isano n’uburiganya bukorerwa ku mbuga zo gutanga inguzanyo hifashishijwe ikoranabuhanga, ikoreshwa nabi rya sisitemu z’amakarita ya banki, ndetse n’imikoranire y’abakozi b’imbere muri banki n’abanyabyaha.
Abasesenguzi bavuga ko ibi bigaragaza uko ibyaha by’imari bigenda bihindura isura muri Afurika y’Iburasirazuba, aho iterambere ryihuse ry’ikoranabuhanga mu rwego rw’imari (digitalisation) ryazamuye serivisi z’imari zigera kuri benshi, ariko rikongera n’ibyago byo kwibasirwa n’ibyaha byo kuri murandasi.
