Ikigo cy’Igihugu cy’Ibarurishamibare, NISR, cyatangaje abarangiza amasomo ya tekinike, imyuga n’ubumenyingiro TVET, bakabona akazi biyongeyeho 9.9% mu myaka itanu aho bavuye kuri 58.2% bari ho mu 2021 bakagera kuri 68% mu 2025.
Iyi raporo ya NISR ituruka ku bushakashatsi bwakozwe yerekana uko imibare y’abakora n’Abashomeri ihagaze aho igaragaza ko abarangije amasomo ya TVET ari bo bagira amahirwe yo kugira akazi kurusha abarangije amasomo y’uburezi rusange.
Imibare yerekana ko mu 2021 abarangiza muri TVET bakabona akazi bari kuri 58.1% mu gihe abarangiza mu masomo y’uburezi rusange bari kuri 39.7%.
Mu 2022 abarangiza muri TVET bakagira amahirwe yo kubona akazi bageze kuri 63.8% mu gihe abarangiza mu masomo y’uburezi rusange bageze kuri 41.4%. Mu 2023 imibare yaragabanyutse ku barangiza muri TVET igera kuri 62% naho abo mu burezi rusange bariyongeye bagera kuri 45.9%.
Mu 2024 imibare yariyongeye ku mpande zombi aho muri TVET bageze kuri 67.2% mu gihe abo mu masomo rusange bo bageze kuri 50.5%.
Mu mwaka wa 2025 nabwo yariyongeye abasoza amasomo muri TVET bakabona akazi bageze kuri 68% mu gihe abasoza mu masomo y’uburezi rusange bo bageze kuri 52.4%.
Iyi mibare ya NISR itanga ishusho nshya ku isoko ry’umurimo mu Rwanda, ikaba ishimangira gahunda ya Leta yo guteza imbere amashuri y’imyuga n’ubumenyi ngiro (TVET).
Ubushakashatsi bwerekana ko abarangije kaminuza mu masomo asanzwe (General Education) akenshi bategereza akazi igihe kirekire, mu gihe abarangiza mu masomo y’ubumenyi ngiro bahita binjira mu mirimo itanga serivisi cyangwa iy’inganda.
Imibare igaragaza ko abize imyuga n’ubumenyingiro bafite amahirwe menshi yo kwihangira imirimo kurusha abize amasomo rusange, kuko ubumenyi bafite bubemerera gukora badategereje gushyirwa mu myanya n’abandi.
Ubushakashatsi bugaragaza ko imirimo mu nzego zitandukanye nko mu bwubatsi, amashanyarazi, ubukanishi, n’ikoranabuhanga rishingiye ku nganda, ari yo ifite abakozi benshi ugereranyije n’imyanya y’ubuyobozi bwo mu biro.
Raporo ya Minisiteri y’Uburezi ku bikorwa by’uburezi mu 2024/2025, yashyizwe hanze ku wa 30 Werurwe 2026, yagaragaje ko abiga mu mashuri y’imyuga n’ubumenyingiro (TVET), nk’abiga muri Level 1 kugeza kuri Level 5 biyongereyeho 15,6% bagera kuri 135,025 mu 2025 ariko ikibazo kikaba umubare muto w’abakobwa bitabira aya masomo.
Muri gahunda ya kabiri y’igihugu yo kwihutisha iterambere (NST2), Leta y’u Rwanda yiyemeje ko 60% by’abarangiza amashuri yisumbuye bagomba kuba barize amasomo ajyanye n’imyuga n’ubumenyingiro (TVET) kugira ngo hagabanuke icyuho cy’ubushomeri mu rubyiruko.
