Urwego Ngenzuramikorere (RURA) rwatangaje ibiciro bishya by’ingendo rusange mu ntara zitandukanye z’u Rwanda, bikaba biteganyijwe gutangira kubahirizwa ku wa Mbere, tariki ya 6 Mata 2026.
Nk’uko byatangajwe Ku rutonde rw’uko ibiciro bihagaze, urugendo rufite igiciro kiri hejuru kurusha izindi ni uruva i Nyabugogo rugana i Kamembe unyuze i Huye, aho ruzajya rwishyurwa amafaranga y’u Rwanda 11.445. Mu gihe uhisemo inzira inyura i Karongi, urugendo ruzajya rutwara 10.296 Frw.
Mu ntara y’Amajyaruguru, urugendo rwa Nyabugogo-Musanze ruzajya rwishyurwa 3.821 Frw, mu gihe mu ntara y’Amajyepfo, urugendo rwa Nyabugogo-Huye ruzajya rutwara 5.068 Frw.
Ku rundi ruhande, mu ntara y’Iburasirazuba, urugendo rurerure rwa Nyabugogo-Kagitumba ruherereye mu Karere ka Nyagatare ruzajya rwishyurwa 7.900 Frw, naho urugendo rwa Nyabugogo-Rusumo mu Karere ka Kirehe ruzajya rutwara 7.029 Frw.
RURA yatangaje ko ibi biciro bishya byashyizweho hagamijwe kunoza imitangire ya serivisi z’ingendo rusange, harebwa ku mpinduka z’ibiciro by’ibikomoka kuri peteroli ndetse n’ibindi bigira ingaruka ku mikorere y’abatwara abagenzi.
Abagenzi n’abatwara ibinyabiziga basabwe kubahiriza ibi biciro bishya, mu rwego rwo kwirinda amakimbirane no gukomeza gutanga serivisi inoze.
Ibi biciro bishya bitegerejweho kugira uruhare mu kunoza uburyo bwo gutwara abagenzi mu gihugu hose, no gutuma serivisi irushaho kugenda neza mu buryo bujyanye n’igihe cy’izamuka ry’ibikomoka kuri peteroli buri guterwa n’intambara zo mu burasirazuba bw’isi.
