Ingabo z’u Rwanda ziri mu butumwa bw’amahoro n’Abanyarwanda baba muri Sudani y’Epfo, bafatanyije n’abahagarariye Umuryango mpuzamahanga, bateraniye hamwe mu gikorwa cyo kwibuka ku nshuro ya 32 Jenoside yakorewe Abatutsi mu 1994.
Iki gikorwa cyabaye kuri uyu wa 7 Mata 2026, kikaba cyabaye umwanya wo kwibuka abazize Jenoside no kuzirikana amasomo akomeye yasigiye Isi.
Mu murwa mukuru Juba, iki gikorwa cyabereye mu Kigo cya Loni cya Tomping, gihuriza hamwe Ingabo z’u Rwanda ziri mu butumwa bw’amahoro bw’Umuryango w’Abibumbye muri Sudani y’Epfo (UNMISS), Abanyarwanda baba muri Sudani y’Epfo, abayobozi ba Loni, abahagarariye Guverinoma ya Sudani y’Epfo ndetse n’imiryango mpuzamahanga ishamikiye kuri Loni.
Iki gikorwa cyabaye urubuga rwo kwibuka hamwe no kongera gushimangira umuhigo wo guharanira ko Jenoside itazongera kubaho ukundi.
