Impunzi z’Abanye-Congo zikomeje kwinjira mu Rwanda zihunze imirwano ihuje M23 n’Igisirikare cya Repubulika Iharanira Demokarasi ya Congo, FARDC na FDLR, aho imibare ibarurwa igaragaza ko abamaze kwakirwa barenga 1200.
Kugeza mu gitondo cyo kuri uyu wa Kabiri, Abanye-Congo bakiriwe na Leta y’u Rwanda, bakomeje kujyanwa mu Nkambi ya Rugerero iri mu bilometero bitanu uvuye mu Mujyi wa Gisenyi.
Uyu mubare ukomeje kwiyongera uko amasaha yisunika, wiganjemo ababyeyi n’abana ndetse n’urubyiruko.
Bamwe bahawe imodoka zibageza ku nkambi, abandi bagenda n’amaguru, cyane ko urugendo atari rurerure cyane.
Mu baganiriye na RBA, bavuga ko bahunze umujyi wa Goma, kubera ko amasasu ari menshi, nta mutekano bari bagifite, akaba ariyo mpamvu baje gushaka aho baba Bari hafite umutekano.
Imirimo yo gutunga Inkambi ya Rugerero irarimbanyije, hubatswe amahema ari gutangirwamo serivisi zirimo iz’ubuvuzi n’ubundi bufasha ndetse hagejejwe ibikoresho birimo matelas, imisambi na gaz zo kwifashisha mu guteka.
Impunzi zageze mu Rwanda kuri uyu wa Kabiri, zasanze izindi zirenga 270 zaraye mu Nkambi ya Rugerero, aho zose zishimira uko zakiriwe na Leta y’u Rwanda.
Kuri uyu munsi, mu Mujyi wa Rubavu uhana imbibi na Goma, haramutse umutuzo, bitandukanye n’uko byari bimeze ku wa Mbere, urusaku rw’amasasu avugira i Goma rwagabanutse ndetse abaturage bakomeje kujya mu mirimo yabo isanzwe.
