Ambasaderi w’u Rwanda mu Muryango w’Abibumbye, Ernest Rwamucyo, yagaragaje ko hakenewe kurandura Umutwe w’Iterabwoba FDLR ugizwe n’abasize bakoze Jenoside mu Rwanda, uri kurwanira mu Burasirazuba bwa Repubulika Iharanira Demokarasi ya Congo, kuko ari yo nzira izatuma Akarere kabona amahoro.
Ni bimwe mu byo yagarutseho ku wa Kabiri, mu Kanama k’Umuryango w’Abibumbye ka Loni, kiga ku kibazo cy’umutekano muke uri mu Burasirazuba bwa RDC, by’umwihariko nyuma y’uko Umujyi wa Goma wigaruriwe n’Umutwe wa M23 mu ntangiriro z’icyumweru.
Umutwe wa FDLR ugizwe n’abasize bakoze Jenoside yakorewe Abatutsi mu Rwanda mu 1994, ndetse igahitana ubuzima bw’abantu barenga miliyoni.
Nyuma yo gutsindwa n’ingabo zari iza RPA Inkotanyi, bamwe mu bagize FDLR uyu munsi bahungiye mu Burasirazuba bwa RDC, ndetse ni bamwe mu mitwe myinshi iri gukorana n’Igisirikare cya FARDC, mu ntambara ihanganyemo n’Umutwe wa M23.
Guverinoma ya RDC yagiye ivuga ko Umutwe wa M23 ufashwa n’Igisirikare cy’u Rwanda, ibyo Leta y’u Rwanda yamaganiye kure, ahubwo ikagaragaza ko FARDC ikorana n’imitwe y’iterabwoba nka FDLR ishaka gukuraho ubutegetsi bw’u Rwanda.
Yakomeje agaragaza ko Guverinoma ya RDC ikomeza kugaragaza ubushake buke mu kugana inzira y’ibiganiro byo kugarura amahoro mu Karere, birimo ibya Luanda bihuza icyo gihugu n’u Rwanda, ndetse n’ibya Nairobi bigihuza n’Umutwe wa M23.
Rwamucyo agaragaza ko nyuma yo gutsindwa na M23, Ingabo za FARDC zatangiye ibikorwa by’ubushotoranyi ku Rwanda, aho zarashe ibisasu ku butaka bw’u Rwanda, byaguyemo abaturage icyenda, abandi 35 barakomereka, mu gihe abagera kuri 681 bakanzwe n’amasasu babaye bimuriwe mu Nkambi ya Kijote iri mu karere ka Rubavu.
Ati “Ku wa 26 Mutarama 2025, ubwo byavugwaga ko M23 yafashe Goma, ingabo za RDC zari ziri guhunga zarashe ku butaka bw’u Rwanda. U Rwanda rwamaganye ibi bitero byagabwe mu Mujyi wa Rubavu byahitanye abantu icyenda, abasivili b’inzirakarengane, abandi 35 bagakomereka.”
Akomeza ashimangira ko kubera impamvu z’ubushotoranyi, u Rwanda rudateze gukuraho ingamba z’ubwirinzi rwashyize ku mipaka.
Ati “Ibi bikorwa byo kurasa ku bushake ni ibyaha by’intambara bidakwiye kwihanganirwa, ndetse ni igihamya ko ingamba z’ubwirinzi z’u Rwanda zikwiye kugumaho, kuko zashyiriweho kwirinda ibihungabanya umutekano nk’ibi.”
Rwamucyo yavuze ko u Rwanda rwiteguye kugana inzira y’ibiganiro byaganisha ku kugarura amahoro n’umutekano mu Burasirazuba bwa RDC, kuko u Rwanda ruzi neza ingaruka z’intambara ndetse rutifuza gusubira mu bihe rwanyuzemo mu myaka 30 ishize.
Ati “U Rwanda ruhora rushaka amahoro kuko ari twe dufite byinshi twahomba. Ndashimangira ko u Rwanda ruzi inyungu iva mu kuba ufite amahoro. Twanyuze mu bihe bikomeye nta mahoro, igihugu cyacu cyari kigiye kuba umuyonga, ariko twakoze ibishoboka ngo twubake amahoro, duharanire amahoro mu karere.”
Kuri ubu u Rwanda rumaze kwakira impunzi zirenga 1200 ziturutse mu Burasirazuba bwa RDC, aho ziri kujyanwa mu Nkambi ya Rugerero iri mu bilometero bitanu uvuye mu Karere ka Rubavu, ndetse rwakiriye abakozi ba Loni n’imiryango yabo bagera ku 1832, bahunze imirwano iri Goma, bafashwa gukomeza i Kinshasa no mu bihugu byabo.
Rwamucyo yihanganishije Umuryango w’Abibumbye ku bw’abasirikare 13 bawo baguye ku rugamba barwanagamo na M23 ndetse asaba Guverinoma ya RDC kwemera bakagana inzira y’ibiganiro nk’uburyo bwo gukemura ikibazo, agaragaza ko cyari kuba cyarakemuwe igihe kinini gishize.
Yahamagariye RDC gushyira hasi umugambi wo gukuraho ubutegetsi bw’u Rwanda ifatanyije n’imitwe y’iterabwoba irimo FDLR n’Ingabo z’u Burundi.
